Qazaqstan halqyna qory júrek aqaýynyń óte aýyr diagnozymen týǵan Musa esimdi balanyń Ońtústik Koreiaǵa meditsinalyq aviatasymaldaý aqysyn tólep berdi, dep habarlaidy QazAqparat.
Bul týraly qordyń baspasóz qyzmeti málimet taratty.
«Qor kishkentai Musanyń Ońtústik Koreiaǵa meditsinalyq aviatasymaldaý aqysyn tólep berdi. Balaqaidyń týa bitken júrek aqaýynyń óte aýyr túri diagnozy bar. Alty ailyq Musa Sultashev ata-anasymen birge Atyraý oblysynan Koreianyń Seýl qalasyndaǵy INCHEON SEJONG HOSPITAL meditsinalyq mekemesine tikelei arnaiy reispen ushty», - dep jazylǵan uiymnyń baspasóz habarlamasynda.
Musanyń shetelde emdelý aqysyn ózge qaiyrymdylyq uiym tolyǵymen ótep bergen. Sondyqtan onyń ata-anasy «Qazaqstan halqyna» qoryna meditsinalyq transporttaý aqysyn tóleýge ótinish bildirgen bolatyn.
«Ushaqpen sapar 12 saǵatqa sozyldy, ońai bolǵan joq, biraq bizdiń kishkentai batyr shydamdy boldy. Endi emdi bastaimyz», - deidi balanyń ákesi Jalǵas Sultashev.
Sondai-aq qor Batys Qazaqstan oblysy, Aqsai qalasynyń turǵynyna kishkentai turǵynyna Reseidiń Máskeý qalasyndaǵy V.I. Kýlakov atyndaǵy «Akýsherlik, ginekologiia jáne perinatologiia ulttyq meditsinalyq ǵylymi ortalyǵynda» jasalatyn otanyń aqysyn tólep beretin boldy.
«Quzyretti organnyń meditsinalyq qorytyndysyn zerdelegen Saraptamalyq komissiianyń usynymy boiynsha qor naýqastyń ekinshi otasyn emdeý kýrsyn tóleý týraly sheshim qabyldady. Qazir qyz bala ata-anasymen birge aýyr ota jasatý úshin saparǵa daiyndalýda. Kishkentai qazaqstandyqtardyń ómirin saqtap qalý úshin qordan 52 million teńge bólindi», - dep jazylǵan qordyń aqparatynda.
