Qazaqstan halqy jinaǵan gýmanitarlyq kómek. Sýrette Ýkrainanyń Qazaqstandaǵy elshisi Petr Vrýblevskii kishkentai qyzymen birge júk kólikteriniń janynda tur. Nur-Sultan, 11 naýryz 2022
11 naýryzda tańerteń 40 tonna gýmanitarlyq júk tielgen eki júk kóligi Nur-Sultan qalasynan Ýkrainaǵa attandy. Ýkraina elshisi Petr Vrýblevskiidiń sózine qaraǵanda, júk kóliginde azyq-túlik, dári-dármek jáne ózge de qajetti zattar bar. Ol Ýkrainaǵa kómek aktsiiasyna óte kóp adamnyń úles qosqanyn aityp, qazaqstandyqtarǵa alǵys bildirdi, dep habarlaidy Azattyq.
Elshilik ókilderiniń aitýynsha, bul - Qazaqstannan Ýkrainaǵa qurlyq ústimen jiberilgen alǵashqy gýmanitarlyq kómek. Buǵan deiin shamamen 25 tonna júk tielgen bort ushaq arqyly Ýkrainaǵa jetkizilgen.
Júk kólikteri Ázerbaijan, Túrkiia, Grýziia, Bolgariia, Rýmyniia arqyly Ýkrainanyń Kiev oblysyna jetkizilýi tiis.
"Petropavl, Óskemen, Qaraǵandy, Aqtaý, Atyraý, Qyzylorda, Almaty jáne ózge óńirlerden ǵana emes, Qazaqstanǵa jaqyn elderdegi azamatattar da úles qosyp jatqanyna qýandyq. Bizge kómek beremiz dep Qytaidan jazdy. Resei, Belarýs siiaqty onnan astam elden azamattar jaýap qatty" deidi eriktilerdiń biri Rahymbek Ábdirahmanov.
Eriktilerdiń aitýynsha, Qazaqstan boiynsha "El bolashaǵy" bastamasy arqyly 150 mln teńge jinalǵan. Oǵan negizinen dári-dármek, merzimi ótpeitin tamaqtar satyp alynǵan. Ol boiynsha esep kelesi aptada tolyq jariialanady. On myńdaǵan adam dári-dármek, gigiena zattary, balalar kiimi, aiaq kiim siiaqty zattar ákelik kómektesken. On myńdaǵan adam aqsha jibergen.
