1997 jyldyń 20 qazanynda Memleket basshysy Nursultan Nazarbaevtyń Jarlyǵymen Aqmola qalasy elimizdiń elordasy bolyp jariialanǵan bolatyn. Búgingidei aqparattyq tehnologiialar qarqyndy dami qoimaǵan zamanda respýblika halqy el ordasynyń Alataý baýraiyndaǵy Almatydan Saryarqa tórindegi Aqmolaǵa aýysqanyn sol kezde «Qazaqstan» teleradio korporatsiiasynyń birinshi vitse-prezidenti bolǵan Saýytbek Abdrahmanov aityp berdi.
«1997 jyldyń jaz aiynda Almatydan Aqmolaǵa alǵashqy jýrnalist retinde keldim desem artyq aitqandyq emes. Nege olai kesip aitamyn? Óitkeni, jaz aiynda «Qazaqstan» teleradio korporatsiiasynyń birinshi vitse-prezidenti retinde Saryarqa tórine uzaq merzimdik is-saparǵa jiberilgen edim. «Keminde 3 ai bolatyn shyǵarsyz» dep te eskertkeni esimde. Sol kezde aldyma qoiylǵan mindet Aqmoladan «Aqsham» aqparattyq baǵdarlamasynyń shyǵýyn qamtamasyz etý, materialdyq-tehnikalyq bazasyn jasaý, kadrlardy daiyndaý boldy. Ol mindet óz ýaqytynda der oryndaldy. Aqmolaǵa memlekettik rámizderimiz jetkizilgen kúni keshki saǵat 20-00-de «Aqshamnyń» Aqmoladan berilýi qamtamasyz etildi», - dep eske alady Saýytbek Abdrahmanov.
Búginde Májilis depýtaty Saýytbek aǵa osy rette basynan ótken sol bir kúnderdegi qyzyqty oqiǵamen bólisti.
«Biz eki qala ákiminiń telekópirin oilastyrdyq. «Basqa pále tilden» demekshi, ideianyń avtory retinde bul jumys maǵan tapsyryldy. Telekópirge Almaty qalasynyń ákimi kelisimin bergenimen, Aqmola oblysynyń ákimi bas tartty. Osy oraida «oblys ákiminiń qatysy qansha, qala ákimi qaida?» degen saýaldyń kese-kóldeneń aldan shyǵary aitpasa da túsinikti. Másele mynada, Aqmola ol kezde oblysqa baǵynyshty qala, iaǵni oblys ákimi basqarady. Óńirge basshylyq jasap otyrǵan Jánibek Káribjanov óziniń qatysa almaityndyǵyn, ornyna orynbasary Svetlana Jalmaǵanbetova bolatyndyǵyn eskertti. Shynyn aitqanda, oǵan bizdiń kóńilimiz tústi. «Almatydan qala ákimi, al myna jaqtan oblys ákiminiń orynbasary shyqsa, qalai bolmaq» dep oilandyq. Ol kezde oblys, qala basshylary ortalyq organmen kelisip baryp sóileitin», - dedi ol.
Osyndai áýre-sarsańmen júrgende telekópir ótedi dep belgilengen kún de kelip jetedi.
«Telekópir ótetin kúni oblys ákimdiginiń baspasóz qyzmetinen 2 saǵattan keiin óńir basshysynyń ózi baratyndyǵy týraly habar jetti. «Aiaq astynan mundai ózgeris nege oryn aldy eken» dep tań qaldyq. Osy aralyqta bizge de habar jetti. Sóitsek, 2 saǵattai ýaqyt buryn ǵana Prezident Aqmola qalasyn Qazaqstan Respýblikasynyń resmi astanasy etip jariialaý jónindegi Jarlyqqa qol qoiypty. Al Jánibek Sálimuly soǵan deiin «másele sheshilgen emes, men ne dep aitamyn» dep eki oily bolyp turǵan eken. Fakspen Prezident Jarlyǵy kelgen kezde ǵana Jánibek Sálimuly ózi barýǵa sheshim qabyldaǵan. Telekópir ótip, onyń áseri óte joǵary boldy. Óitkeni, keshke saǵat 20-00-degi sońǵy jańalyq berilmegen. Búgingidei habar tez taraityn áleýmettik jeliler joq. Osylaisha, halyq Aqmola qalasynyń astana bolyp jariialanǵanyn aqparattyq habardan buryn telekópirden estidi», - dedi Saýytbek Abdrahmanov.
Saýytbek Abdrahmanuly «Qazaqstan» telearnasyna basshylyq qyzmetke kelgenge deiin Ortalyq komitette, Prezident apparatynda jumys istegen. Sondyqtan tilshiler arasynda «Abdrahmanov 20 qazanda Jarlyqqa qol qoiylatynyn bilip, telekópirdi sol kúnge qoiǵan eken» degen áńgime tarap ketedi.
«Shynymen bilgenim joq, sáti solai keldi. Jalpy eldiń eldigi, memlekettiń bastaýy týraly aitqan kezde kóbine Konstitýtsiiany, ánurandy, eltańbany aldymen ataimyz. Negizinde bizdiń eldigimizdi eselendirgen, aiqyndaǵan sipattardyń eń bastysy - ol astanany ózimizdiń tańdaýymyz, ornatýymyz. Óitkeni, el bolǵannan keiin onyń Konstitýtsiiasy, eltańbasy, ánurany, týy bolýǵa tiis. Táýelsiz el bolǵannan keiin ol eldiń halyqaralyq uiymdarǵa múshe bolýy da zańdy. Al el bolǵannan keiin ordańdy óziń qai jerde tigetinińdi aiqyndaý - Táýelsizdiktiń eń basty kórinisi. Arqaǵa aýyp kelip, altyn qazyq qaǵýda, qazaq jeriniń qaq ortasy kieli Saryarqaǵa kelip orda tigýde Elbasymyzdyń eren eńbegi jatyr», - dep túiindedi sózin Saýytbek Abdrahmanov.
.jpeg)