Memleket basshysy Qatar Ámiriniń shaqyrýyn zor rizashylyqpen qabyl alǵanyn jetkizdi. Prezident osy elge alǵash ret memlekettik saparmen kelip otyrǵanyn, sondyqtan onyń mán-mańyzy erekshe ekenin atap ótti, dep habarlaidy "Ult aqparat" Aqordanyń baspasóz qyzmetine silteme jasap.
"Qatar – islam álemindegi bizdiń senimdi ári mańyzdy áriptesimiz. Eki eldiń qarym-qatynasyna tyń serpin beretin kez keldi dep oilaimyn. Qazaqstan men Qatar bailanystaryn tolyq strategiialyq áriptestik deńgeiine kóterýdi usynamyn. Sapar kezinde óte mańyzdy qujattarǵa qol qoiylady. Bul kelisimder bizdiń yntymaqtastyǵymyzdy strategiialyq deńgeige kóteredi. Biz úshin Qatar óte erekshe el, sizdermen bailanystarymyzdy joǵary baǵalaimyz. Sondyqtan bul qatynastarymyzdy odan ári damytý úshin kúsh-jigerimizdi salamyz. Bizge kórsetilgen qonaqjailyǵyńyzǵa rizashylyǵymyzdy bildiremiz", – dedi Qasym-Jomart Toqaev.
Óz kezeginde Qatar Memleketiniń Ámiri sheih Támim ben Hamad Ál Táni Qazaqstan Prezidenti saparynyń mán-mańyzyna toqtaldy.
"Joǵary Mártebeli Prezident myrza, bizdiń elimizge eń alǵashqy memlekettik saparmen kelip otyrǵanyńyzǵa qýanyshtymyn. Búgingi kelissózder eki el arasyndaǵy qarym-qatynastardy eselei túsetinine senemin. Biz Astanada da kezdestik. Búgingi júzdesýimiz burynǵy kelissózder negizinde qol jetkizilgen ýaǵdalastyqtardyń júzege asyrylýyn qadaǵalap, aldaǵy josparlardy aiqyndaýǵa múmkindik beredi. Ekijaqty yntymaqtastyq aiasynda energetikalyq, saýda-ekonomikalyq jáne investitsiialyq jobalardy iske asyrýǵa múddelimiz. Osy sapar aiasynda bizdiń eldiń iri biznes ókilderimen kezdesýler ótkizesiz. Bul atalǵan salalardaǵy yqpaldastyqty ilgeriletýge tyń serpin beretinine senimdimin", – dedi Qatar Memleketiniń Ámiri.
Memleket basshysy qazir qazaq-qatar qarym-qatynastary keiingi 30 jylda eń jaqsy kezeńdi bastan ótkerip otyrǵanyn atap ótip, Ámirdiń Astanaǵa jasaǵan memlekettik saparyn eske saldy. Prezidenttiń aitýynsha, elderimiz arasynda tyǵyz saiasi dialog, keńeiip kele jatqan ekonomikalyq seriktestik jáne tabysty mádeni-gýmanitarlyq bailanystar qalyptasqan. Eki el arasynda sońǵy úsh jylda qol qoiylǵan kelisimder ártúrli saladaǵy yntymaqtastyqty odan ári nyǵaitýǵa berik negiz boldy.
Qasym-Jomart Toqaev Qatardy jaqyn bolashaqta Qazaqstandaǵy eń iri investorlardyń ondyǵyna kiredi dep esepteitinin jetkizdi. Prezident Qazaqstannyń Qatar naryǵyna jalpy quny 250 million dollar bolatyn 60 shikizattyq emes taýar túri boiynsha eksportty ulǵaitýǵa daiyn ekenin aitty. Sonymen qatar jaqyn arada taýar ainalymyn 500 million dollarǵa deiin arttyrý týraly aityldy.
Kelissóz barysynda aýyl sharýashylyǵy, kólik-logistika, týrizm máseleleri talqylandy. Atap aitqanda, Memleket basshysy Qatardy Shyǵanaq pen Ortalyq Aziiany bailanystyratyn intermodaldy kólik jelisin damytý úshin kúsh-jiger biriktirýge shaqyrdy. Bul aimaqtaǵy ekonomikalyq belsendilikti yntalandyrýǵa yqpal etedi. 2030 jylǵa qarai sýarmaly jer kólemin 3 million gektarǵa deiin ulǵaitýdy josparlap otyrǵan elimiz qazir bidai men un óndirý boiynsha álemde alǵashqy ondyqqa kiredi. Qasym-Jomart Toqaev aýyl sharýashylyǵy salasyndaǵy yntymaqtastyqty arttyrýǵa negiz bar ekenine nazar aýdardy.
Sonymen qatar mádeni-gýmanitarlyq bailanystardy nyǵaitý máselesi talqylandy. Memleket basshysy 2025 jyly eki el astanalarynda Qazaqstan men Qatardyń mádeniet kúnderin uiymdastyrýdy usyndy. Bul sharalar mádeni murasy bai halyqtarymyzdy jaqyndata túsetinine senim bildirdi.
Budan bólek, aimaqtyq jáne halyqaralyq kún tártibindegi ózekti máseleler qarastyryldy.
Aita keteiik, Prezident Qasym-Jomart Toqaev alǵash ret Katarǵa memlekettik saparmen bardy jáne Konsýltativtik keńestiń (Shýra Májilisi) aldynda sóz sóilegen birinshi shet memlekettiń basshysy boldy.
