Qarýly Kúshterdegi qyzmetin jan-jaqty baǵalaý, ony utymdy paidalaný men kásibi áleýetin damytý úshin 15 myńnan astam ofitser qajetti attestattaýdan ótedi, dep habarlaidy "Ult aqparat" QR Qorǵanys ministrliginiń baspasóz qyzmetine silteme jasap.
Ony ótkizý úshin 2021 jyly Qorǵanys ministrligi ofitserler quramyn attestattaýdy uiymdastyrýǵa qatysty usynystar ázirledi. Ol eki kezeńde ótedi.
Alǵashqy kezeńde – birinshi aqpan men birinshi shilde aralyǵynda Bas shtab, Qorǵanys ministrligi, QK ásker túrleri bas qolbasshylary basqarmalary, óńirlik qolbasshylyqtar áskerleri men ásker tekteri qolbasshylary basshylyq býynynyń, áskeri bólimder komandirleriniń bilimderi men quzyretteri tekseriledi. Qyzmetine jáne jeke basyna qatysty jaǵymsyz minezdeme alǵan ofitserler de attestattaýǵa jatady.
Birinshi shildede bastalatyn ekinshi kezeń qalǵan ofitserlerge qatysty ótkiziledi. Áskeri qyzmetshiler sybailas jemqorlyqqa qarsy is-qimyl aiasyndaǵy zańnamany bilýine synaq tapsyrady, áskeri qyzmet boiynsha retteýshi qujattardy bilýine tekserýden jáne psihologiialyq testileýden ótedi.
Komissiia attestattalýshynyń atqaratyn laýazymdaryna sáikestigin jáne olardyń ári qarai qyzmet etý perspektivasyn aiqyndaidy.
Attestattaý nátijeleri boiynsha ár áskeri qyzmetshi kásibi, jeke qasietteri men áleýetti múmkindikteriniń jan-jaqty jáne obektivti sipattamasyn alady. Árbir áskeri qyzmetshini qai baǵyttarda daiarlaý men qaita daiarlaý talap etiletinin belgileidi.
Osylaisha, qyzmeti boiynsha joǵarylatý jáne oqýǵa jiberý maqsatynda ofitserlerdiń kadrlyq rezervi qalyptastyrylady, anyqtalǵan kemshilikterdi joiý boiynsha usynymdar ázirlenedi.
Qazaqstan Respýblikasy Qarýly Kúshteriniń ofitserler quramyn attestattaý 2021 jyldyń qarashasyna deiin jalǵasady.
