QR Qorǵanys ministri Nurlan Ermekbaevtyń buiryǵy boiynsha Qarýly Kúshterdiń quramalary men áskeri bólimderi «Aibalta - 2019» aýqymdy strategiialyq komandalyq-shtabtyq oqý-jattyǵý aiasynda dabyl boiynsha kóterildi, dep habarlaidy "Ult aqparat".
Ministrliktiń baspasóz qyzmetinen málim etkendei, oqý-jattyǵýdyń negizgi maqsaty áskeri basqarý organdarynyń úilesimdiligin jetildirý, áskerlerdiń dalalyq mashyǵyn arttyrý jáne áskerlerdiń basqarýda shtabtar men komandirlerdiń turaqty praktikalyq daǵdylaryn shyńdaý bolyp tabylady.
«Oqý-jattyǵýdyń manevrine shamamen 8 myń áskeri qyzmetshi jáne 2 myńnan astam qarý-jaraq pen áskeri tehnika, maidandyq jáne armiialyq aviatsiia tartyldy. Oqý-jattyǵýǵa Qurlyq áskerleri, Áýe qorǵanysy kúshteri, Arnaiy operatsiialar kúshteri, arnaiy áskerler men materialdyq-tehnikalyq qamtamasyz etý bólimderi men bólimsheleri tartyldy. Strategiialyq komandalyq-shtabtyq oqý-jattyǵýǵa qatysýshylar quramdastyrylǵan tásilmen, óz júrisimen, temirjol kóligimen, áskeri-kólik aviatsiiasynyń ushaqtarynda kórsetilgen aýdanǵa qozǵalys jasap, belgilengen aýdanǵa shoǵyrlanyp, oqý-jaýyngerlik tapsyrmalardy oryndaýǵa kiristi», - delingen ministrlik aqparatynda.
Málim bolǵandai, áskerlerdiń temirjol kóligimen qozǵalýy úsh baǵyt boiynsha júzege asyryldy. Oǵan 20-dan asa áskeri eshelon tartyldy. 400-den astam áskeri tehnika dittegen jerge segiz kolonna bolyp jetti. Qozǵalystyń uzyndyǵy - 300-1000 shaqyrymnan astam.
Oqý-jattyǵý ótkiziletin aýmaqtaǵy jaǵdai qazirgi kezdegi qarýly qaqtyǵystardyń tájiribesi negizinde shynaiy jaýyngerlik is-qimyldarǵa jaqyndatylyp jasaldy. «Kóktal» poligonynda materialdyq-tehnikalyq qamtamasyz etýdiń ortalyq bazasy ornalastyryldy. Onda azyq-túlik, kiim-keshek jáne tehnikalyq múlik, janar-jaǵarmai materialdary, áskerler toptamasynyń jaýyngerlik qyzmetiniń qajettiligi úshin oq-dárilerge arnalǵan qoimalar bar. Sondai-aq jyljymaly mobildi áskeri-dalalyq gospital uiymdastyryldy.
«Aibalta - 2019» strategiialyq komandalyq-shtabtyq oqý-jattyǵýy Almaty oblysynyń «Kóktal» oqý-jattyǵý poligonynda ótkizilip jatyr jáne ol aǵymdaǵy jylǵy 3 mamyrǵa deiin jalǵasady.
