Foto: ashyq derekkóz
Qazaqstan Úkimeti qarasorany (kannabis) ónerkásiptik maqsatta óńdeýge arnalǵan resmi erejelerdi bekitti. Bul qujat jeńil ónerkásipten bastap qurylys indýstriiasyna deiingi túrli salalarda ósimdikti zańdy túrde qoldanýǵa jol ashady, dep jazady Ult.kz LS.kz saityna silteme jasap.
Qandai salalar qarasorany paidalana alady?
Jańa qaǵidada qarasorany qandai kásiporyndar óndiristik maqsatta óńdei alatyny naqty kórsetilgen. Eń basty talap — óńdeý protsesinde esirtki jáne psihotroptyq zattar óndirilmeýi tiis.
Qujatta:
«Partiia dep ónerkásiptik maqsatta ósirýge ruqsat etilgen bir sorttaǵy qarasora sabaǵynyń kez kelgen kólemi sanalady», – delingen.
Barlyq shikizat bir mezgilde jinalyp, bir qujatpen rásimdelip, kásiporynǵa tapsyrylýy kerek.
Shikizatty qabyldaý tártibi
Kásiporyndar qarasorany oram nemese prestelgen kúide qabyldaidy.
Qabyldaý aldynda memlekettik ýákiletti organnyń saraptamasy qajet. Saraptama ósimdiktegi tetragidrokannabinol (TGK) deńgeiiniń zańdy normadan aspaitynyn rastaýy tiis.
Qarasora qandai ónerkásipterde qoldanylmaq?
Jańa erejege sáikes, qarasorany tereń óńdeý tómendegi salalarda júrgiziledi:
Toqyma ónerkásibi
– Mata, arqan, tehnikalyq jip, toqylmaǵan materialdar jáne basqa ónimder.
Tselliýloza-qaǵaz ónerkásibi
– Qaǵaz, karton, súzgi materialdary jáne ózge de buiymdar.
Qurylys indýstriiasy
– Arbolit, hempcrete (qarasora beton), jylýoqshaýlaǵysh plitalar men qurylys materialdary.
Azyq-túlik jáne mal azyǵy óndirisi
– Mai, un, kúnjara, aqýyz kontsentrattary, mal azyǵy.
Biokompozitter
– Avtokólik bólshekteri, jihaz, qaptamalyq materialdar jáne basqa ekobuiymdar.
Ekonomika úshin jańa kezeń
Sarapshylardyń pikirinshe, qarasorany ónerkásiptik deńgeide óńdeýdiń zańdastyrylýy:
-
jańa óndiristerdiń ashylýyna,
-
innovatsiialyq ónimderdiń paida bolýyna,
-
óńdeý salalarynda jańa jumys oryndarynyń qurylýyna múmkindik beredi.
Bul sheshim Qazaqstan ekonomikasynyń ártaraptanýyna serpin beretin qadam retinde baǵalanýda.
