Qazaqstan Qara teńizdegi júk kemelerin Kaspiige qaitarady. Bul týraly QR Indýstriia jáne infraqurylymdyq damý ministri Qaiyrbek Óskenbaev Úkimet otyrysynda aitty, dep habarlaidy QazAqparat.
«Qalyptasqan jaǵdaiǵa bailanysty Qazaqstan aýmaǵy arqyly ótetin júk tasymalynyń kólemi ósedi dep boljap otyrmyz. Tranzit úshin túrli kedegilerdi joiý boiynsha qandai shara qabyldap jatyrsyzdar», - dep surady Úkimet basshysy Álihan Smaiylov.
Ministrdiń aitýynsha, bul múmkindikti paidalanýdyń birneshe joly qarastyrylyp otyr.
«Qazirgi jaǵdaiǵa bailanysty eń tar jerlerdi qarastyryp otyrmyz. Eń mańyzdysy qazir Aqtaý portynda konteinerlik hab qurý bolyp tur. Investorlarmen kezdesip jatyrmyz. 10 mlrd teńge kóleminde joba daiyn. Sáýir aiynda singapýrlyq kompaniia kelgeli otyr. Olar naryqqa qyzyǵýshylyq bildirýde. Eger olar jasamasa, jergilikti investorlar da ol jobany alýǵa daiyn.
Ekinshiden, sol Kaspii boiynsha parom tasymalyn, keme tasymalyn, júk tasymalyn kúsheitýimiz kerek. Negizi 4 kememiz bar. Olardy Qara Teńizden Kaspii teńizine alyp kelýimiz kerek. «Osyndai múmkindik bar, júk tasymlanyń tranziti boiynsha óte úlken deńgeige jeteiin dep jatyr. Sol sebepti sizderge úlken múmkindik bar. Parom, kemeler satyp alýǵa aqsha salyńyzdar» dep aityp otyrmyz», - dedi ministr.
Aitýynsha, qazir Qazaqstanǵa temirjoldyń áleýetin de sarqa paidalanatyn kezeń týyp otyr.
«Úshinshiden, «Qazaqstan temirjolymen» birge temrijoldyń da jaǵdaiyn qarastyryp jatyrmyz. Eń mańyzdysy Dostyq-Moiynty temirjol ýchaskesi. Ol jobany iske asyrsaq, Bizde qazir tranzittik múmkindigimiz 5 ese ósetin bolady. Úshinshi baǵytqa kórshiles Ózbekstan tarapy da úlken kóńil bólip otyr. Aýǵanstan arqyly Pákistanǵa shyǵatyn joldarmen bizge qosylsyn dep otyrmyz. Sol úshin Darbaza-Maqtaral temirjolyn salmaqshymyz», - dedi Qayiyrbek Óskenbaev.
