قازاقستان قارا تەڭٸزدەگٸ جٷك كەمەلەرٸن كاسپييگە قايتارادى. بۇل تۋرالى قر يندۋسترييا جەنە ينفراقۇرىلىمدىق دامۋ مينيسترٸ قايىربەك ٶسكەنباەۆ ٷكٸمەت وتىرىسىندا ايتتى, دەپ حابارلايدى قازاقپارات.
«قالىپتاسقان جاعدايعا بايلانىستى قازاقستان اۋماعى ارقىلى ٶتەتٸن جٷك تاسىمالىنىڭ كٶلەمٸ ٶسەدٸ دەپ بولجاپ وتىرمىز. ترانزيت ٷشٸن تٷرلٸ كەدەگٸلەردٸ جويۋ بويىنشا قانداي شارا قابىلداپ جاتىرسىزدار», - دەپ سۇرادى ٷكٸمەت باسشىسى ەليحان سمايىلوۆ.
مينيستردٸڭ ايتۋىنشا, بۇل مٷمكٸندٸكتٸ پايدالانۋدىڭ بٸرنەشە جولى قاراستىرىلىپ وتىر.
«قازٸرگٸ جاعدايعا بايلانىستى ەڭ تار جەرلەردٸ قاراستىرىپ وتىرمىز. ەڭ ماڭىزدىسى قازٸر اقتاۋ پورتىندا كونتەينەرلٸك حاب قۇرۋ بولىپ تۇر. ينۆەستورلارمەن كەزدەسٸپ جاتىرمىز. 10 ملرد تەڭگە كٶلەمٸندە جوبا دايىن. سەۋٸر ايىندا سينگاپۋرلىق كومپانييا كەلگەلٸ وتىر. ولار نارىققا قىزىعۋشىلىق بٸلدٸرۋدە. ەگەر ولار جاساماسا, جەرگٸلٸكتٸ ينۆەستورلار دا ول جوبانى الۋعا دايىن.
ەكٸنشٸدەن, سول كاسپيي بويىنشا پاروم تاسىمالىن, كەمە تاسىمالىن, جٷك تاسىمالىن كٷشەيتۋٸمٸز كەرەك. نەگٸزٸ 4 كەمەمٸز بار. ولاردى قارا تەڭٸزدەن كاسپيي تەڭٸزٸنە الىپ كەلۋٸمٸز كەرەك. «وسىنداي مٷمكٸندٸك بار, جٷك تاسىملانىڭ ترانزيتٸ بويىنشا ٶتە ٷلكەن دەڭگەيگە جەتەيٸن دەپ جاتىر. سول سەبەپتٸ سٸزدەرگە ٷلكەن مٷمكٸندٸك بار. پاروم, كەمەلەر ساتىپ الۋعا اقشا سالىڭىزدار» دەپ ايتىپ وتىرمىز», - دەدٸ مينيستر.
ايتۋىنشا, قازٸر قازاقستانعا تەمٸرجولدىڭ ەلەۋەتٸن دە سارقا پايدالاناتىن كەزەڭ تۋىپ وتىر.
«ٷشٸنشٸدەن, «قازاقستان تەمٸرجولىمەن» بٸرگە تەمرٸجولدىڭ دا جاعدايىن قاراستىرىپ جاتىرمىز. ەڭ ماڭىزدىسى دوستىق-مويىنتى تەمٸرجول ۋچاسكەسٸ. ول جوبانى ٸسكە اسىرساق, بٸزدە قازٸر ترانزيتتٸك مٷمكٸندٸگٸمٸز 5 ەسە ٶسەتٸن بولادى. ٷشٸنشٸ باعىتقا كٶرشٸلەس ٶزبەكستان تاراپى دا ٷلكەن كٶڭٸل بٶلٸپ وتىر. اۋعانستان ارقىلى پەكٸستانعا شىعاتىن جولدارمەن بٸزگە قوسىلسىن دەپ وتىرمىز. سول ٷشٸن داربازا-ماقتارال تەمٸرجولىن سالماقشىمىز», - دەدٸ قاىيىربەك ٶسكەنباەۆ.
