Búgingi tańda Qazaqstan qalalaryna 498 jasandy tynys alý apparaty jetkizildi, dep habarlaidy "Ult aqparat" QR Indýstriia jáne infraqurylymdyq damý ministrliginiń baspasóz qyzmetine silteme jasap.
Onyń ishinde Nur-Sultan qalasyna 126, Almatyǵa 64, Shymkentke 156 apparat jetkizilip, qajettilik tolyq óteldi. Sondai-aq, Aqmola oblysy 3, Almaty oblysy 32, Aqtóbe oblysyna 25, Qyzylorda oblysyna 53 jáne Pavlodar oblysyna 39 jasandy tynys alý apparatyn aldy. Taǵy da osyndai 276 apparat Almaty, Aqtóbe, Pavlodar, Túrkistan jáne Qaraǵandy oblystaryna beriledi. 377 apparaty stendti synaqtardan ótip jatsa, 349-y jiberýge daiyn.
Jalpy biylǵy 15 qazanǵa deiin elimizdiń barlyq óńirine 1,5 myńdai jasandy tynys alý apparatyn jetkizý josparlanyp otyr. Qazaqstanda memlekettiń qatysýymen «Qazaqstan Aselsan injiniring» JShS (Nur-Sultan qalasy) jáne «Tynys» AQ (Kókshetaý qalasy) kásiporyndary jasandy tynys alý apparatyn shyǵarady. Bul kásiporyndar - «Qazaqstan injiniring» ulttyq kompaniiasynyń enshiles uiymdary.
Koronavirýs pandemiiasyna bailanysty elde qalyptasqan epidemiologiialyq jaǵdaiǵa orai jasandy tynys alý apparattary jetispeýshiligin eskerip, «Qazaqstan Aselsan injiniring» JShS qysqa ýaqyt ishinde ókpeni jasandy jeldetetin statsionarlyq apparattar óndirisin igerdi. Al «Tynys» AQ «Kókshetaý-4P» jasandy tynys alý 680 mobildi apparatyn shyǵarady.
Meditsina mamandarynyń pikirinshe, apparat qoldanýǵa yńǵaily ári senimdi jáne elektr qýatyna táýeldi emes. Kásiporynnyń óndiristik qýaty aiyna 500 apparat shyǵarýǵa jetedi.
Odan bólek, «Tynys» AQ jasandy tynys alý portativti apparattaryn, «Kókshetaý 3» meditsinalyq buiymdardyń túrli nomenklatýrasyn, onyń ishinde kóp rettik betperdelerdi, múgedekterge arnalǵan arbalardy jáne t. b. zattardy shyǵaryp jatyr.
«Bul kásiporyndardyń negizgi qyzmeti Qazaqstan Respýblikasynyń jáne ózge de elderdiń Qarýly Kúshteriniń qajettilikteri úshin joǵary tehnologiialyq ónimder shyǵarýǵa baǵyttalǵan. Al jasandy tynys alý óndirisi meditsinalyq mekemelerdiń qajettilikterin óteýge baǵyttalǵan memlekettik tapsyrys aiasynda jolǵa qoiyldy. Kásiporyndar qosymsha qajettilik týyndaǵan jaǵdaida meditsinalyq tehnika men kez kelgen ónimdi qajet mólsherde óndirip, jetkize alady», - delingen habarlamada.
