Qasym-Jomart Toqaev «Ál-Azhar» ýniversitetiniń Joǵarǵy imamy Ahmad at-Taiebpen kezdesti, - dep habarlaidy "Ult aqparat" Aqordaǵa silteme jasap.
Memleket basshysy Álemdik jáne dástúrli dinder kóshbasshylarynyń basqosýyna orai joldaǵan shaqyrýyn qabyl alǵany úshin «Ál-Azhar» islam ýniversitetiniń Joǵarǵy imamy, sheih Ahmad at-Taiebke rizashylyq bildirdi.
– Biz ózińiz basqaratyn «Ál-Azhar» ýniversitetin ortaq dinimiz – islam qundylyqtaryn dáripteýshi «shamshyraq» retinde qarastyramyz. Sondyqtan toleranttyq pen ustamdylyqty, sabyrlyq pen meiirimdilikti tý etken ortalyq ǵulamalarynyń búgingi Álemdik jáne dástúrli dinder kóshbasshylarynyń basqosýyna qatysýy biz úshin óte mańyzdy, – dedi Prezident.
Qasym-Jomart Toqaev mártebeli meimanǵa islam biliminiń ordasy jáne dini ekstremizmge qarsy is-qimyl ortalyǵy sanalatyn «Ál-Azhar» ýniversitetinde qazaqstandyq stýdentterdiń bilim alýyna jasalǵan jaǵdaidy joǵary baǵalaitynyn jetkizdi. Sonymen qatar «Ál-Azhardyń» Qazaqstanda islam bilimi men zertteýleriniń damýyna qomaqty úles qosyp otyrǵanyn erekshe atap ótti.
Kelesi jyly sultan Beibarystyń týǵanyna 800 jyl tolady. Memleket basshysy atalǵan mereitoiǵa daiyndyq aiasynda Qazaqstan tarapy Kairdegi sultan Beibarys meshitin qaita jóndeýge aitarlyqtai úlesin qosatynyn aitty.
Kezdesý sońynda Qasym-Jomart Toqaev Mysyr Prezidenti Ábdel Fattah as-Sisige ystyq yqylasqa toly sálemin joldady. Óz kezeginde «Ál-Azhardyń» Joǵarǵy imamy Memleket basshysyna Mysyr Prezidentiniń júrekjardy sálemin jetkizdi.
