Qazaqstan «Todini» italiandyq qurylys kompaniiasyna qarsy shyqqan tórelik sheshimdi májbúrlep oryndatty, dep habarlaidy "Ult aqparat" Ádilet ministrligine silteme jasap.
Budan buryn habarlanǵandai, 2019 jylǵy 11 maýsymda Parij qalasyndaǵy Halyqaralyq saýda palatasynyń tórelik soty «Todini Impregilo Kazakhdorstroy» BK qurylys kompaniiasy bastamashylyq etken daý boiynsha Qazaqstan Respýblikasynyń paidasyna sheshim shyǵardy. Talap aryz somasy 20 mln AQSh dollaryn qurady.
Sheshimge sáikes, Talapker 277 000 AQSh dollaryn Qazaqstan Respýblikasyna keltirilgen shyǵystar esebinde tóleýi tiis boldy.
«Todini» tórelik sheshimdi óz erkimen oryndaýdan bas tartýyna bailanysty Ádilet ministrligi Qazaqstan Respýblikasynyń aýmaǵynda tórelik sheshimdi taný jáne ony oryndaý maqsatynda is-sharalar keshenin ótkizdi.
Birinshi kezeńde, QR Azamattyq protsestik kodeksiniń 503-babyn basshylyqqa ala otyryp, Ádilet ministrligi Nur-sultan qalasynyń Mamandandyrylǵan aýdanaralyq ekonomikalyq sotyna tórelik sheshimdi taný jáne oryndaý týraly ótinish berdi. Azamattyq is júrgizý zańnamasynyń talaptaryna sáikes qajetti materialdardy jinaý júzege asyryldy, tórelik sheshimniń, birlesken kásiporynnyń jáne korporativtik qujattardyń túpnusqasyn sot isin júrgizý tiline aýdarý qamtamasyz etildi.
Ádilet ministrligi sotty óz talaptarynyń zańdy ekendigine sendire aldy, nátijesinde sot Ádilet ministrliginiń talaptaryn tolyq kólemde qanaǵattandyrdy. Keiinnen «Todini» apelliatsiialyq tártippen Nur-sultan qalasynyń MAES uiǵarymyn joiýǵa áreket jasady. Alaida Nur-sultan qalasynyń soty ótinish berýshilerdiń talaptaryn qoldaýdan bas tartty.
«Todini» tórelik sottyń sheshimin oryndamaǵandai sot aktisin de óz erkimen oryndamady. Osyǵan bailanysty olardy májbúrlep oryndaý isi júzege asyryldy. Nátijesinde 277 000 AQSh dollary óndirildi.
Osylaisha, Ádilet ministrligi tórelikte memlekettiń múddelerin qorǵaý jáne tórelik sheshimdi oryndaý jónindegi jumysty tolyq kólemde aiaqtady.
