QR Premer-Ministri Álihan Smaiylov Qazaqstan ǵylymyn damytýdyń 2022-2026 jyldarǵa arnalǵan tujyrymdamasynyń qabyldaýdy tapsyrdy, dep habarlaidy QazAqparat.
Úkimet basshysy ǵylym men biznes tyǵyz bailanysta bolǵanda ǵana óndiris damyp, halyqqa naqty paida keletinin atap ótti. Eń aldymen, ǵylymi jańalyqtarǵa muqtaj kásiporyndardy anyqtaý úshin marketing júiesin engizý kerek jáne Ǵylym qory óz jumysyn investitsiialyq tartymdylyqty arttyrýǵa, ǵylymi zertteý nátijelerin kommertsiialandyrýǵa baǵyttaýy tiis.
Osyǵan orai Á. Smaiylov Bilim jáne ǵylym ministrligine birqatar tapsyrma berdi.
«Birinshi, 30 sáýirge deiin Qazaqstan ǵylymyn damytýdyń 2022-2026 jyldarǵa arnalǵan tujyrymdamasynyń qabyldanýyn qamtamasyz etsin. Ekinshi, jas talanttardy izdeý jáne olardy ǵylymǵa tartý mehanizmderin pysyqtasyn, zertteý áleýeti joǵary ǵalymdardyń jańa býynynyń aqparattyq bazasyn jasasyn. Úshinshiden, Ulttyq Ǵylym akademiiasyna memlekettik mártebe bere otyryp, institýtsionaldyq transformatsiialaý sharalaryn qabyldasyn», - dedi Premer-Ministr Úkimet otyrysynda.
Sonymen birge, Ǵylym qorynyń ekonomikalyq tiimdiligin arttyrýǵa, ǵylymi zertteýlerdi kapitaldandyrýǵa, olardyń investitsiialyq tartymdylyǵyn, barlyq kezeńdegi ashyqtyǵyn arttyrýǵa mán berip, rebrending jasaý tapsyryldy.
«Biznes-qoǵamdastyq ókilderimen jáne «Atameken» kásipkerler palatasymen birlesip, Halyqtyń tabysyn arttyrýdyń 2025 jylǵa deiingi baǵdarlamasy jobasyna ǵylymdy qajet etetin óndiristerdi, joǵary tehnologiialyq jumys oryndaryn qurýda ǵylymnyń úlesi bólimin qosyp, onyń naqty indikatorlaryn belgileýdi qamtamasyz etsin. Indýstriia jáne Energetika ministrlikterimen birlesip, ǵylymi-tehnikalyq keńester qurýdy jáne jer qoinaýyn paidalanýshylardyń ǵylymi-zertteý jumystaryn qarjylandyrýynyń ortalyqtandyrylǵan mehanizmi engizilisin», - dedi Álihan Smaiylov.
Aita keteiik, Úkimet otyrysynda Premer-Ministr ǵylym salasyndaǵy qyzmetkerlerdi kásibi merekesimen quttyqtady.
«Búgin elimiz Ǵylym kúnin atap ótedi. Elimizde otandyq ǵylymdy damytý jolynda eńbek etip júrgen barlyq qyzmetkerlerdi kásibi merekesimen quttyqtaimyn! Sizderge tyń ǵylymi jańalyqtar, jumystaryńyzǵa zor tabys jáne sáttilik tileimin! Búgingi Úkimet otyrysynda otandyq ǵylymdy damytý máselesin qaraimyz», - dedi Álihan Smaiylov.
