Memleket basshysy Áielder isteri jáne otbasylyq-demografiialyq saiasat jónindegi ulttyq komissiia múshelerin 25 jyldyǵyna orai quttyqtaý hat joldady, dep habarlaidy "Ult aqparat".
Mereitoilyq dataǵa arnalǵan Qazaqstan áielderi forýmyna Parlament depýtattary, halyqaralyq uiymdar men azamattyq sektor jáne halyqaralyq uiym ókilderi qatysty.
Qasym-Jomart Toqaev quttyqtaý sózinde forýmǵa qatysýshylardy Áielder isteri jáne otbasylyq-demografiialyq saiasat jónindegi ulttyq komissiia músheleriniń 25 jyldyǵymen quttyqtady.
«Komissiia genderlik tendikti qamtamasyz etý, otbasy institýtyn nyǵaitý jáne ana men balany qorǵaý isinde erekshe ról atqaryp keledi. Bul qurylym ýákiletti organdardyń, azamattyq sektordyń jáne biznestiń kúsh-jigerin toǵystyratyn tiimdi minberge ainaldy.
Ulttyq komissiianyń sarapshylary zańdardy jáne memlekettik baǵdarlamalardy ázirleýge belsendi atsalysyp, mańyzdy áleýmettik jobalar men bastamalardy júzege asyrýda. Keiingi kezde elimizde áielder úshin tyiym salynǵan mamandyqtar tizimi joiyldy, sailaý kvotalary engizildi, ishki ister organdary júiesinde áiel quqyqtaryn qorǵaý jónindegi arnaýly bólimder quryldy. Sizderdiń eseli eńbekterinizdiń arqasynda Qazaqstan birqatar halyqaralyq konventsiiany ratifikatsiialap, genderlik teńsizdikti joiý jónindegi barlyq mindettemelerin oryndap keledi. Biz áielderdiń qoǵamdaǵy mártebesin kóterý jene otbasy qundylyqtaryn dáripteý úshin júieli sharalardy jalǵastyryp, barshaǵa birdei múmkindik beretin memleket – Ádiletti Qazaqstandy qurý jolynda naqty qadamdar jasaimyz», – delingen Prezidenttiń quttyqtaý sózinde.
Forýmǵa qatysýshylar otbasylyq-demografiialyq saiasat, áielderdiń qazirgi qoǵamdaǵy róli, otbasylardy áleýmettik jáne ekonomikalyq qoldaý, balalar quqyqtary jáne basqa da kóptegen aspektilerge qatysty mańyzdy máselelerdi talqylady.
