2020 jyldyń jeti aiynda gaz óndirý kólemi 13,4 mlrd tekshe metrdi qurady. Bul týraly Úkimet otyrysynda QR Energetika ministri Nurlan Noǵaev aitty, dep habarlaidy "Ult aqparat".
«2020 jyldyń 7 aiynda gaz óndirý kólemi 13,4 mlrd tekshe metrdi qurady. Bul kórsetkish ótken jyldyń sáikes kezeńimen salystyrǵanda 1 paiyzǵa joǵary. Tabiǵi gazdy ishki tutyný kólemi 9,5 mlrd tekshe metrdi qurap, ótken jyldyń kórsetkishimen salystyrǵanda 102 paiyz boldy. Suiytylǵan munai gazyn óndirý kólemi 1,8 mln tonnaǵa jetti. Bul ótken jyldyń 7 aiymen salystyrǵanda 105 paiyz joǵary. Sonyń 938 myń tonnasy ishki naryqta paidalanyldy», - dedi ministr.
Nurlan Noǵaevtyń atap ótýinshe, Energetika jáne Ulttyq ekonomika ministrlikteriniń suiytylǵan munai gazyn bólshek saýdada ótkizýge shekti baǵalardy bekitý týraly birlesken buiryǵy qabyldanǵan.
«Osy buiryqty iske asyrý avtokólikke janarmai retinde qoldanylatyn suiytylǵan gazdyń baǵasyn turaqtandyrýǵa múmkindik berdi. Qabyldanǵan júieli sharalardyń nátijesinde avtogaz quiý stansasyndaǵy suiytylǵan gazdyń bólshek saýdadaǵy baǵasynyń tómendeýi qamtamasyz etildi. Atap aitqanda, óńirlerde suiytylǵan munai gazynyń ortasha baǵasy 2 paiyzdan 32 paiyzǵa deiin, al Qazaqstan boiynsha 12 paiyzǵa tómendedi», - dedi ol.
