«Qazaqstan Ǵarysh Sapary» AQ prezidenti men Ulttyq ǵarysh agenttigi tóraǵasynyń orynbasary laýazymdy qyzmetin asyra paidalandy degen kúdikke ilinip otyr, dep habarlaidy "Ult aqparat".
Nur-Sultan qalasynyń sybailas jemqorlyqqa qarsy qyzmeti «Jerdi qashyqtyqtan zondtaý ǵarysh júiesi» (JQZǴJ) jobasyn júzege asyrýǵa bólingen qarajattyń jymqyrylýyna qatysty isti tergeýde. Tergeý barysynda «Qazaqstan Ǵarysh Sapary» AQ prezidenti men Ulttyq ǵarysh agenttigi tóraǵasy orynbasarynyń laýazymdy qyzmetin asyra paidalanǵany anyqtalǵan.
«Qoǵamnyń burynǵy basshysy 2009 jyldyń 6 qazanynda qarjylyq-ekonomikalyq negizsiz frantsýzdyq «EADSAstrium» kompaniiasymen quny 260 mln eýro turatyn eki spýtnik jetkizý týraly kelisimge kelgen. Sonymen qatar qoǵamnyń taǵy bir burynǵy prezidenti, keiin ministrlikterdiń birinde vitse-ministr bolǵan adam «Astana Banki» AQ-ǵa 1,6 mlrd teńgeni negizsiz salýyna qatysty kúdikke ilindi. Atalmysh banktegi defoltqa bailanysty qarajat qaitpai qalǵan», - dep habarlaidy Sybailas jemqorlyqqa qarsy is-qimyl agenttiginen.
Jemqorlyqqa qarsy kúres qyzmetkerleri «Qazaqstan ǵarysh sapary» men Qazǵaryshtyń osy iske qatysty laýazymdy tulǵalarynyń úiine tintý júrgizgen. Tintý barysynda mańyzdy qujattar men zattar, sonymen qatar ulttyq jáne sheteldik valiýtadaǵy qarajat tárkilengen.
«Sonymen birge jobany júzege asyrýǵa qatysqan laýazymdy tulǵalarǵa qatysty qazir tergeý amaldary júrgizilip jatyr. Tergeý jalǵasýda» delingen habarlamada.
