Qazaqstan fýtbol federatsiiasy memleket esebinen qarjylandyrýdan bas tartty. Bul týraly federatsiianyń baspasóz qyzmetinen málim etti, dep habarlaidy QazAqparat tilshisi.
Qazaqstan fýtbol federatsiiasynyń bas hatshysy Azamat Aithojin 2022 jylǵy álem chempionatynyń irikteý kezeńi aiasynda Frantsiiamen ótken sátsiz oiyn úshin (8:0) keshirim surady.
«Eń áýeli qazaqstandyq jankúierlerden Frantsiiamen oiynda sátsizdikke ushyraǵanymyz úshin keshirim suraǵym keledi. Ár jeńilisti biz jan dúniemizden ótkeremiz. Negizgi quramdaǵy biraz fýtbolshynyń bolmaýyna bailanysty, Parijde ońtaily qurammen oinaý múmkin bolmady. Búgingi tańda ulttyq komandamyzdyń rezervtik quramy joq deýge bolady. Komanda jetekshilerin almastyrǵan oiynshylar áli halyqaralyq deńgeide oinaýǵa daiyn emes», - deidi federatsiianyń bas hatshysy.
Azamat Aithojinniń aitýynsha, keiingi jyldary Qazaqstan fýtbolyna 100 mlrd teńgeden astam qarjy jumsalǵany týraly aqparat shyndyqqa janaspaidy.
«Jurtshylyqtyń synyna keletin bolsaq, ashyq aitaiyn: byltyr jáne onyń aldyndaǵy jyly Qazaqstan fýtbol federatsiiasy memlekettik biýdjetten 200 million teńgeden alyp otyrdy. Ol aqsha ulttyq komandanyń túrli jastaǵy quramalaryna (U17, U19, U21 sanaty boiynsha), Blind-Football (zaǵip jandarǵa arnalǵan fýtbol), áielder, ulttyq, jaǵajai, sondai-aq fýtzal quramasyn halyqaralyq jarystarǵa jumsaldy. Qaidaǵy milliardtar týraly aitylyp jatyr?», - deidi federatsiia ókili.
Sondai-aq, ol kelesi jyldan bastap Qazaqstan Fýtbol federatsiiasy memlekettik jáne kvazimemlekettik qurylymdardyń qarjysynan bas tartý týraly sheshim qabyldanǵanyn málimdedi.
«Uiym ÝEFA-dan túsetin jáne demeýshilerdiń aqshasynan qarjylandyrylady. Sondyqtan, ulttyq quramanyń sátsizdikterin óz jarnamasy úshin paidalanǵysy keletinderge aitarym bar. Sizder eń bolmaǵanda, til bezemei turyp, problemany tereń túsinip alyńyzdar, materialdyq bólikti zertteńizder. Elimizde fýtbol bar, bolǵan jáne bola beredi. Bizde fýtbolmen tynystaityn milliondaǵan adam bar. Árine, ulttyq fýtboldyń deńgeiin jańa deńgeige kóterý úshin ýaqyt pen janashyr, jankúierlerdiń qoldaýy kerek», - degen Azamat Aithojin jýyqta ulttyq quramanyń bas jattyqtyrýshysymen birge jurtty tolǵandyratyn suraqtarǵa jaýap berý úshin sport jýrnalisterimen kezdesý ótkiziletinin jetkizdi.
Eske salsaq, qarashanyń 13-inen 14-ine qaraǵan túni Qazaqstan fýtbolshylary 2022 jylǵy álem chempionatynyń irikteý kezeńi aiasynda Frantsiia quramasymen Parijde kezdesip, 8:0 esebimen oisyrai utyldy. Qazaqstan quramasy buǵan deiin eshbir oiynda mundai iri eseppen jeńilip kórmegen. Buǵan deiingi antirekord «6:0» bolatyn.
