Elordada «Rýhani Jańǵyrý» qazaqstandyq qoǵamdyq damý institýty Qazaqstan halqynyń jalpy tarihi-mádeni murasyna etnostardyń qosqan úlesi týraly zertteýdiń nátijesin tanystyrdy. Bul eńbek el damýyna eleýli úles qosqan 50 kórnekti tulǵadan turatyn biregei málimetter bazasy túrinde usynyldy, dep habarlaidy QazAqparat.
«Bizdiń elimiz táýelsiz ulttyq memlekettiliktiń ózindik úlgisin qura aldy, onyń negizgi quramdastary: patriotizm, etnomádeni dástúrler men qoǵamdyq kelisim qundylyqtary bolyp tabylady. Sondyqtan «Rýhani jańǵyrý» aiasynda júzege asyrylatyn osyndai jobalar ulttyq birlikti nyǵaitýda erekshe mańyzǵa ie bolady. Bizdiń tarihi-mádeni muramyz – elde turatyn barlyq etnostardyń ortaq rýhani jáne ziiatkerlik úlesiniń nátijesi ekenin naqty mysaldar arqyly kórsetkimiz keledi», - dep atap ótti «Rýhani Jańǵyrý» qazaqstandyq qoǵamdyq damý institýty» KeAQ Basqarma tóraǵasy Kemelbek Oishybaev «Qazaqstan etnostary: elimizdiń damýyna qosqan úlesteri. Biz birgemiz» atty respýblikalyq ǵylymi-tájiribelik konferentsiiada.
Osy oraida ol qazaq jerindegi damý úrdisine laiyqty úlesterin qosqan túrli etnos ókilderinen turatyn tanymal tulǵalardyń málimetter bazasy qurylǵanyn atap ótti. Bul jumystar aiasynda qyzý pikirsaiystar uiymdastyryldy.
«Talqylaý sharalarynan keiin eń tanymal 50 adady iriktep, olarǵa qatysty kitap shyǵaryldy. Osy tulǵalardy úlgi ete otyryp, biz jas býyndy tárbieleitin bolamyz»,- dedi Kemelbek Oishybaev.
Olardyń arasynda kompozitor, professor Brýsilovskii Evgenii Grigorevich, ańyzǵa ainalǵan folklorist, etnograf, kompozitor Zataevich Aleksandr Viktorovich te bar.
Aita ketý kerek, HH ǵasyrdyń basy men ortasynyń mádeniet jáne qoǵam qairatkerlerimen qatar, eńbekte Gerold Belger, Nina Patrýsheva, Anatolii Hrapatyi, Denis Ten jáne basqa da qazirgi Qazaqstannyń damýyna úles qosqan qazaqstandyqtardyń eńbegi atap ótildi.
Óz kezeginde Qoǵamnyń jańǵyrýyn zertteý jáne taldaý basqarmasynyń jalpy ulttyq kelisim salasyndaǵy protsesterdi zertteý tobynyń bas sarapshy-menedjeri Rýziia Qamarova biyl elimizdiń tórt qalasynda konferentsiia aiasynda dialog alańy qurylǵanyn atap ótti.
«Osy konferentsiia aiasynda birneshe qalada tórt dialog alańdaryn qurdyq. Osy oraida Óskemen, Aqtóbe, Petropavl jáne Shymkent qalalary qamtyldy. Osy dialog alańdarynda bizdiń aldyńǵy qatarly tarihshylarymyz, arhiv salasynyń, etnomádeni birlestikterdiń ókilderi shaqyrtyldy. Bul turǵyda Qazaqstannyń damýyna qosqan úlesi boiynsha qai tulǵalardy belgileýdiń ádistemesi pysyqtaldy. Osy tórt dialog alańy qorytyndysy boiynsha birinshi kezeńde 50 tulǵany iriktep, olardyń ómirbaiany aiasynda bizde kitap basylyp shyǵaryldy. Biraq ta bul atqarylatyn jumystardyń tek bastaýy bolyp otyr. Budan keiin biz osy tizimdi keńeitý úshin jumystardy jalǵastyrmaqpyz. Atap aitqanda, Qazaqstan tarihynda elimizdegi barlyq etnostardyń qosqan úlesi qamtylady jáne biz ony umyta almaimyz», - dedi Rýziia Qamarova.
.jpeg)