Abaidyń mereitoiyna qatysty jobalar biylǵy jylmen ǵana shektelmeidi. Bul týraly elordadaǵy Abaidyń 175 jyldyq mereitoiynyń resmi ashylýyna arnalǵan saltanatty sharada QR Mádeniet jáne sport ministri Aqtoty Raiymqulova málim etti, – dep habarlaidy QazAqparat.
«Mereitoi aiasynda shet elderde birqatar mańyzdy sharalar ótkiziledi. Qazaqstannyń elshilikteri janynan «Abai ortalyqtary» ashylady. Bul – álemge aqynnyń eńbekteri men ulttyq qundylyqtarymyzdy qatar tanytý degen sóz. Aqynnyń ǵibratty ǵumyry halqymyzdyń tól óneri – aitys arqyly da keńinen nasihattalady. Biz uly Abaidyń ósietin máńgi jadymyzda saqtaýǵa tiispiz», - dedi A. Raiymqulova.
Sonymen qatar vedomstvo basshysy Abaidyń qasterli mekeni – áigili Jidebaidy abattandyrýdy sharalary qolǵa alynatynyn atap ótti.
«Sol arqyly uly aqynnyń rýhyna taǵzym etip keletin jurtshylyqqa laiyqty jaǵdai jasaimyz. Mundai qadam óńirde mádeni týrizmniń damýyna tyń serpin beredi. Mereitoiǵa bailanysty budan basqa da kóptegen mádeni is-shara ótkiziledi. Prezidentimiz Qasym-Jomart Toqaev «eń basty maqsat – toi toilaý emes, oi tolǵaý ekenine» zor mán berip otyr. Is-sharalardy ótkizý kezinde ysyrapshyldyq pen naýqanshyldyqqa jol berilmeidi», - dep toqtaldy ministr.
Onyń sózine qaraǵanda, keibir jobalar biylǵy jylmen shektelmeidi, iaǵni aldaǵy ýaqytta jalǵasyn tabady.
«Jalpy, biz Abaidyń mereitoiyna qoǵamdyq sanany jańǵyrtatyn óte mańyzdy shara retinde mán beremiz. Abai murasy – jańa Qazaqstannyń odan ári ósip-órkendeýine jol ashatyn baǵa jetpes qundylyq. Uly oishyldyń ósietine árdaiym berik bolsaq, el retinde eńselene túsemiz. Abai mereitoiy – Elbasymyz bastaǵan Rýhani jańǵyrý baǵdarlamasynyń óte bir mańyzdy bóligi. Tuńǵysh Prezidentimizdiń búgingi osy is-sharaǵa qatysýy búkil Abai murasyn dáripteý jumysyna erekshe serpin beretini sózsiz. Halqymyzdyń boitumary – Abaidyń ónegesin óskeleń urpaqtyń boiyna sińirý – barshamyzǵa paryz. Sondyqtan ultymyzdy ulyqtaityn osyndai igi bastamaǵa jurt bolyp jumyla bileiik!», - dedi Aqtoty Raiymqulova.
Budan buryn habarlanǵandai, búgingi saltanatty sharada Abai týraly birneshe derekti film men teleserial túsiriletini aityldy.
