2021 jyldyń qańtarynda Qazaqstan ekonomikasynyń naqty sektory 3,6 paiyzǵa ósti. Bul týraly búgin Úkimet otyrysynda QR Ulttyq ekonomika ministri Áset Erǵaliev aitty, dep habarlaidy "Ult aqparat".
«2021 jyly álemdik ekonomikanyń damý perspektivasy aiqyn emes. Birqatar perspektivaly vaktsinalardyń ázirlenýine qaramastan, pandemiiamen bailanysty táýekelder saqtalýda. Jeke sektordyń 2020 jyly kapitaldy joǵaltýy, osy jyly álemdik saýdanyń qalpyna kelý perspektivalaryn shekteidi. Ótken jylǵy investitsiialyq aǵyndardyń rekord tómendeýi, álemdik ekonomikanyń potentsialdy ósýiniń orta merzimdi tejeýshi faktory bolady. Iri álemdik ekonomikalar arasyndaǵy qarama-qaishylyqtyń sozylýy álemdik óndiris qurylymyn odan ári qaita bólýge ákeledi. Jahandyq ekonomikanyń atalǵan damý perspektivalaryn negizge ala otyryp, aýqymdy vaktsinatsiialaýdyń tiimdiligine bailanysty, Dúniejúzilik banktiń qańtardaǵy boljamynda 2021 jyly álemdik ekonomikanyń 1,6 paiyzdan 5 paiyzǵa deiingi damý stsenariileri aiqyndaldy», - dedi ol.
Osy rette ministr 2021 jyldyń birinshi aidyń qorytyndylary boiynsha eldiń áleýmettik-ekonomikalyq damýynyń nátijelerine toqtaldy.
«Ken óndirý ónerkásibin esepke almaǵanda, naqty sektor 3,6 paiyz deńgeiinde ósý kórsetti. Sondai-aq, negizgi kapitalǵa investitsiialar ken óndirý ónerkásibin esepke almaǵanda, 25,5 paiyzǵa ósti. Bul aldaǵy ýaqytta ekonomikanyń turaqty ósýine negiz bolady. Jyldyq infliatsiia 7,4 paiyzǵa deiin baiaýlady. Ken óndirý ónerkásibinen basqa, naqty sektordyń barlyq salalary ósim kórsetti. Olar - qurylys, elektrmen jabdyqtaý, óńdeý ónerkásibi, aýyl sharýashylyǵy salalary. Kórsetiletin qyzmetter salasynyń turaqtanýy baiqalady. OPEK+ kelisimi boiynsha mindettemelerdi oryndaýǵa bailanysty munai óndirýdiń 12,3 paiyzǵa qysqarýy ken óndirý ónerkásibiniń tómendeýine ákeldi», - dedi Áset Erǵaliev.
Onyń dereginshe, óńdeý ónerkásibi salalarynda ósý jalǵasýda. Mashina jasaý 16,2, onyń ishinde avtomobil jasaý – 21,2, himiia ónerkásibi ónimderin óndirý – 12,8 jáne qurylys materialdary óndirisi – 11,8 paiyz deńgeiinde joǵary ósý qarqynyn saqtady. Sondai-aq, kiim óndirisi 9,2 jáne farmatsevtika óndirisi 4 paiyzǵa ósti.
«Jalpy alǵanda óńdeý ónerkásibiniń ósýi 3 paiyzdy qurady. 11 óńir ósim kórsetti. Óńdeý ónerkásibinde joǵary ósimdi Shyǵys Qazaqstan Qostanai, Aqmola oblystary, sondai-aq Shymkent qalasy kórsetti.Óndiristiń tómendeýi 6 óńirde tirkeldi. Olar - Batys Qazaqstan, Atyraý, Túrkistan, Qyzylorda, Qaraǵandy jáne Pavlodar oblystary», - dedi ministr.
