QR Ulttyq ekonomika ministri Timýr Súleimenov Qazaqstan ekonomikasynyń munai óndirý men ózge de paidaly qazbalarǵa táýeldiligi qanshalyqty tómendegenin aityp berdi, dep habarlaidy QazAqparat.
«Ekonomikany ártaraptandyrýǵa bailanysty sońǵy 5 jylda aýqymdy jumystar iske asyryldy. Bul turǵyda statistikaǵa súiensek tikelei nátijeni baiqaýǵa bolady. Iaǵni ol jalpy ishki ónim qurylymynda óndirý ónerkásibi salasy úlesiniń tómendeýine qatysty. Bes jylda onyń deńgeii 19,5-20 paiyzǵa jetti. Eger de munai óndirý men qatty paidaly qazbalardy óndirýge toqtalsaq, búginde onyń úlesi 11,5-12 paiyzdy qurady. Atap aitqanda, onyń deńgeii men osy salalardaǵy ózgeristerge qatysty bizdiń ekonomikanyń táýeldiligi tómendedi. Ásirese munai men metall baǵasyna táýeldilik azaidy», - dedi Timýr Súleimenov Parlament Májilisiniń jalpy otyrysynda.
Ministrdiń atap ótýinshe, óńdeýshi ónerkásiptiń úlesi de 11,5-12 paiyz aralyǵynda aýytqyp turýyna qatysty tiisti máseleler bar.
«Degenmen de biz kóptegen ózge de ekonomikalar sekildi servistik ekonomikanyń ósimine senip otyrmyz. Osy kezeńde bizde servistik ekonomika 5 paiyzǵa artty. Bul turǵyda kólik jáne logistika salasynda eleýli ósimdi baiqadyq. Eger de buǵan deiin ekonomikanyń qurylymynda onyń deńgeii 6 paiyz bolsa, qazirgi kezde 9 paiyzǵa jetip qaldy», - dedi Timýr Súileimenov.
QR Qarjy ministri Álihan Smaiylovtyń atap ótýinshe, Ulttyq qordan beriletin kepildendirilgen transfert pen munaiǵa eksporttyq keden bajy (EKB) túrindegi biýdjetke túsetin munai túsimderiniń kólemi 2019 jyly 3,5 trln teńgege nemese 2021 jylǵa qarai 4,1 paiyzǵa tómendep, jalpy ishki ónimniń 5,4 paiyzyn quraidy. Biýdjetke túsetin munai túsimderiniń úlesi 2019 jyly 35,5 paiyzdan 2021 jyly 28,9 paiyzǵa deiin tómendeidi.
Budan buryn habarlanǵandai, Parlament Májilisiniń jalpy otyrysynda QR Ulttyq ekonomika ministri Timýr Súleimenov elimizdiń 2019-2023 jyldarǵa arnalǵan áleýmettik-ekonomikalyq damý boljamyn tanystyrdy.
.jpeg)