Búgin Premer-Ministr Baqytjan Saǵyntaevtyń tóraǵalyǵymen ótken QR Úkimetiniń otyrysy barysynda 2017 jyldyń qańtar-qyrkúiek ailaryndaǵy Qazaqstannyń áleýmettik-ekonomikalyq damýynyń qorytyndysy qaraldy, dep habarlaidy "Ult aqparat" Úkimet basshysynyń saityna silteme jasap.
Ulttyq ekonomika ministri Timýr Súleimenov Qazaqstan ekonomikasy eseptik kezeńde qańtar-tamyz ailarynda jinaqtalǵan ósim qarqynyn 4,3% deńgeiinde saqtaǵanyn aitty. Buǵan makroekonomikalyq turaqtylyq pen investitsiialyq belsendilik, sondai-aq syrtqy naryqtardaǵy qolaily jaǵdailar yqpal etýde.
Memlekettik jáne salalyq baǵdarlamalar aiasynda qabyldanǵan sharalardyń arqasynda ekonomikanyń barlyq salalarynda oń úrdis baiqalatyny atalyp ótti. Ósimniń negizgi qozǵaýshylary ónerkásip, qurylys, saýda, kólik jáne bailanys boldy.
Ónerkásipte jyl basynan beri turaqty ósim baiqalýda, qańtar-qyrkúiekte 8,3%-dy qurady. Taý-ken ónerkásibinde óndiris kólemi 11,3%-ǵa ulǵaidy. Óńdeý ónerkásibiniń ósimi 5,7%-dy qurady. Ishki naryqqa baǵdarlanǵan salalarda eleýli ósim baiqalýda, sonyń ishinde farmatsevtikalyq ónimder shyǵarý, jeńil ónerkásip, azyq-túlik ónimderi men sýsyndar, sondai-aq, munai ónimderi óndirisi.
Eksportqa baǵdarlanǵan salalarda da ósimniń turaqty qarqyny baiqalýda, máselen, qara metallýrgiia óndirisi 7,8%-ǵa, tústi metalldar óndirisi 6,6%-ǵa ósken.
Aýyl sharýashylyǵynda ósim 1,9% deńgeiinde saqtalǵan, sondai-aq, qurylys qańtar-tamyz ailaryndaǵy 0,1%-dan osy jyldyń 9 aiynda 3,5%-ǵa deiin artqan.
Ekonomikanyń naqty sektoryndaǵy joǵarǵy ósim qyzmet kórsetý salasynyń turaqty ósim jolyna birte-birte shyǵýymen súiemeldenedi. Osy jyldyń 9 aiynda kólik qyzmetteri 4,7%-ǵa, saýda jáne bailanys — 3%-ǵa, jyljymaityn múlik operatsiialary — 2,1%-ǵa artqan.
Ekonomika damýyna oń áserin berip jatqan investitsiialar ósiminiń dinamikasy jaqsaryp keledi. 2017 jyldyń 9 aiynda negizgi kapitalǵa salynǵan investitsiialar kólemi 4,4%-ǵa ósti. Saýda men qurylysta investitsialardyń eń kóp ósimi baiqalýda, sonymen qatar jylýmen jáne sýmen qamtý jelilerinde júrgizilgen jańǵyrtý jumystarynyń nátijesinde ónerkásipte de investitsiialar ósimi baiqalyp tur.
Negizgi kapitalǵa investitsiialar ósimi aldymen ishki kózdermen qamtamasyz etildi, al qarjylandyrýdyń syrtqy kózderinde tómendeý baiqalady.
Turaqty makroekonomikalyq jaǵdai turǵysynan, tikelei sheteldik investitsiialardyń jalpy túsimi 2017 jyldyń I jartyjyldyǵynda $10,5 mlrd-qa deiin 8,6%-ǵa ósti. Qazan aiynyń basyndaǵy jaǵdai boiynsha elimizdiń halyqaralyq qory altyn-valiýta saqtyq qorlarynyń 10,2%-ǵa ósýi esebinen $89,4 mlrd-ty qurady.
Toǵyz aidyń qorytyndylary áleýmettik-ekonomikalyq ósimniń barlyq salalarynda oń qarqynnyń saqtalǵanyn kórsetedi. Osyny eskere otyryp, jyl qorytyndysy boiynsha kem degende 3,4% deńgeiinde ekonomika ósimi oryn alady dep boljanǵan.
.jpeg)