QR Premer-Ministri Asqar Mamin qańtar-qarashadaǵy QR áleýmettik-ekonomikalyq damý qorytyndysy týraly Úkimet otyrysyn ótkizdi, dep habarlaidy QazAqparat.
«Qabyldanyp jatqan sharalardyń arqasynda ekonomikanyń bazalyq salalarynda 11 aidyń qorytyndysy boiynsha el ekonomikasynyń jaqsarǵany jáne ósýdiń oń serpini baiqalyp otyr. Óńdeýshi ónerkásipte 3,3% ósý, onyń ishinde tamaq ónimderiniń óndirisinde 3,6%, farmatsevtikada 39,5%, daiyn metall buiymdarynyń óndirisinde 19,6%, mashina jasaýda 16,4%, onyń ishinde avtomobil jasaýda 52,6% jáne de qaǵaz ónimderinde 14,6%, jeńil ónerkásipte 15,5% ósý qamtamasyz etilgen», - dedi Premer-Ministr Úkimet otyrysyn qorytyndylai kele.
Qurylys kólemi 12,1% ulǵaiǵan, sonyń ishinde, paidalanýǵa berilgen turǵyn úi 9,3% ósti nemese shamamen 12,1 mln sharshy metrdi qurady. Aýyl sharýashylyǵynda 5,3% ornyqty ósý qamtamasyz etildi. Taý-ken sektorynyń mańyzdy baǵyttary boiynsha oń serpin saqtalyp otyr, mysaly temir kenin óndirý 0,6%, basqa paidaly qazbalardy óndirý 2,1% ósti.
«Bul rette OPEK+ uiymymen jasalǵan kelisimderdi oryndaý qajet bolǵan jaǵdaida munai óndirýdiń tómendegeni baiqalady. Qyzmetter sektory ornyǵyp, birtindep qalpyna kele bastaǵany baiqalady. Qazan aiymen salystyrǵanda qarasha aiynda saýda-sattyq - 17,1% paiyzǵa, turý jáne tamaqtaný - 10,5% paiyzǵa, bailanys - 4,5% paiyzǵa jáne taǵy da basqa salalarynda ósim tirkelip otyr. Memlekettik organdardyń birinshi basshylary ózderi jetekshilik etetin ekonomika salalarynda josparly kórsetkishterge qol jetkizý jumysyn jalǵastyrýy qajet. Eldegi epidemiologiialyq jaǵdaidyń turaqtanýy jáne de ony aldaǵy ýaqytta da saqtaý – elimizdiń ekonomikalyq damýynyń negizin jasaýda», - dedi Asqar Mamin.
Sóz sońynda Úkimet basshysy memlekettik organdardyń basshylaryna birqatar tapsyrma berdi.
«Óńirlerdiń ákimderi áleýmettik mańyzy bar taýarlardyń baǵasy men tarifterdi turaqtandyrý boiynsha sharalar qabyldasyn. Bul – asa mańyzdy másele jáne onyń áleýmettik mańyzy zor. Bul baǵyttaǵy jumysty uiymdastyrý úshin sizderde barlyq qajetti mehanizmder bar. Baǵany turaqtandyrý máselesin únemi baqylaýda ustaý qajet. Áleýmettik-ekonomikalyq damýdyń josparlanǵan kórsetkishterine qol jetkizý jáne Memleket basshysy belgilep bergen mindetterdi tiimdi iske asyrýdy qamtamasyz etý úshin barlyq óńirler ákimderi naqty sharalardy qabyldaýy qajet.
Jalpy, pandemiianyń eleýli áserine jáne jahandyq ekonomikalyq daǵdarysqa qaramastan, Qazaqstan ekonomikasy turaqty ekenin kórsetti, kórsetkishter birtindep ósip keledi. Biýdjettiń kiris bóligi boiynsha bekitilgen jospardy jyl sońyna deiin 100% oryndaý qajet. Biýdjetti atqarý bóliginde memlekettik organdar men óńirler qarjy jylynyń sońyna deiin biýdjet qarajatynyń tolyq ári tiimdi igerilýin tez arada qamtamasyz etýi qajet», - deidi Asqar Mamin.
