Ótken jyldyń naýryz aiynan beri el ekonomikasy alǵash ret damýdyń oń ári turaqty dinamikasyna tústi. 2021 jyldyń qańtar-sáýir aralyǵyndaǵy áleýmettik-ekonomikalyq damý kórsetkishteri osylai deýge tolyq negiz beredi, dep habarlaidy "Ult aqparat".
Ulttyq ekonomika ministrligi 4 aida JIÓ-niń 0,7 paiyzǵa artýyn budan áldeqaida keiingi merzimde tirkeledi dep boljaǵan edi. Osydan-aq, ekonomikanyń damýy qarqyn ala bastaǵanyn kórýge bolady.
Mundaǵy negizgi draiver naqty sektordaǵy turaqty ósim boldy. Taý-ken ónerkásibin qospasaq, naqty ósim 7,9%-ǵa jetken.
Qurylys sektoryndaǵy ósim budan da qarqyndy, paiyzǵa shaqsaq, 12,5% boldy. Aqparat jáne bailanys salasynda 11,1%, óńdeý ónerkásibinde 7,7%, sýmen jabdyqtaý salasynda 7,5%, elektrmen qamtamasyz etý bóliginde 5,3% jáne aýyl sharýashylyǵynda 3% ósim qalyptasqan. Dál osyndai dinamika turaqty saqtalsa, atalǵan sektorlardyń eldiń jalpy ishki ónimindegi úlesi artyp, ekonomikanyń ártaraptanýyn jyldamdatýy múmkin.
Bárinen de pandemiialyq shekteýlerge qaramastan, óńdeý ónerkásibi sońǵy 10 jylda eń joǵary ósim kórsetkeni sarapshylardy qýantyp otyr. Iaǵni, atalmysh salanyń básekege qabilettiligi artty degen sóz. Ásirese mashina jasaý salasyndaǵy jalpy ishki ónimniń ósimi joǵary (20,6%). Onyń ishinde avtomobil qurastyrý salasynda – 25,4% ósim tirkeldi. Sonymen qatar, qurylys materialdarynyń óndirisinde – 26,5%, himiialyq ónerkásipte – 11,2%, plastmassa buiymdar óndirisinde – 18,5%, farmatsevtikada – 26,2%, kiim ónerkásibinde – 23,6% jáne jihaz óndirýde – 19,5% ósim qalyptasty.
Jyl basynan beri jer qoinaýyn igerýden tys salalardyń qarqyndy damyp jatqany kóńilge senim uialatady. Basqasha aitqanda, ekonomikany ártaraptandyrýǵa baǵyttalǵan sharalar osynaý qiyn kezeńde tiimdiligin kórsetip otyr deýge bolady.
Ulttyq ekonomika ministrliginiń derekteri boiynsha, taý-ken ónerkásibin qospaǵannyń ózinde salalarǵa tartylǵan negizgi kapital 32,3%-ǵa artyp otyr. Ásirese óńdeý ónerkásibine salynyp jatqan investitsiianyń kólemi ósýde. Byltyrǵy kezeńmen salystyrǵanda onyń kólemi 2,1 ese kóp. Sondai-aq, investitsiia aǵyny qurylys salasynda – 72%, aýyl sharýashylyǵynda –66%, aqparat jáne bailanys salasynda –61%, saýda sektorynda –28,3%, kólik sektorynda – 27,6%, jyljymaityn múlikpen bailanysty operatsiialarǵa – 27,5% artyp otyr.
Jalpy ishki ónimniń artýy baspana naryǵynda da jaǵymdy kóńil kúi týǵyzdy deýge bolady. Sonyń arqasynda baspana qurylysy qarqyn alyp keledi. Qańtar-sáýir aralyǵynda qoldanysqa berilgen baspana kólemi 13,3% artqan. Basqasha aitsaq, 3,5 mln sharshy metr baspana óz iesin tapqan.
Buǵan deiin habarlaǵanymyzdai, jalpy óńdeý ónerkásibi boiynsha 13 óńirde ósim bar jáne eń joǵarǵy ósim Almaty men Nur-Sultan qalalarynda jáne Almaty oblysynda tirkelgen.
