Foto: Aqorda
Niý-Iorkte Memleket basshysynyń amerikalyq biznes ókilderimen kezdesýleri aiasynda Qazaqstan Respýblikasynyń Densaýlyq saqtaý ministri Aqmaral Álnazarova jetekshi álemdik korporatsiialarmen kelissózder júrgizdi. Kezdesýlerge Pfizer, General Electric jáne ózge de iri kompaniialardyń basshylary qatysty, dep habarlaidy Ult.kz.
Áńgime barysynda densaýlyq saqtaý júiesin jańǵyrtý, ozyq tájiribe men investitsiia tartý, sondai-aq meditsina salasyndaǵy seriktestikti keńeitý máseleleri talqylandy.
DDU-men yntymaqtastyq
Dúniejúzilik densaýlyq saqtaý uiymynyń Eýropalyq óńirlik biýrosynyń direktory Hans Kliýgemen kelissózder barysynda meditsinalyq-sanitariialyq alǵashqy kómek koalitsiiasy aiasyndaǵy seriktestikti nyǵaitý jóninde ýaǵdalastyqqa qol jetkizildi. Qazaqstan Prezidentiniń bastamasymen qurylǵan Koalitsiia jumysyna halyqaralyq sarapshylar men jastardy tartý úshin arnaiy jumys toby qurylmaq.
Klimat pen densaýlyq máselesi
Kezdesýde klimattyq ózgeristerdiń halyq densaýlyǵyna áseri, sonyń ishinde Aral teńiziniń ekologiialyq apaty da sóz boldy. Taraptar Aral óńirinde keshendi zertteý júrgizý týraly kelisti. Osyǵan bailanysty Qazaqstan, Ózbekstan jáne DDU arasynda úshjaqty Memorandým ázirlenýde.
Sonymen qatar, Qyzylorda qalasynda Aral teńizi máseleleri boiynsha DDU-nyń óńirlik keńsesin ashý bastamasy kóterildi. Bul qadam óńirdiń ekojúiesin qalpyna keltirý, kógaldandyrý, sýarý júielerin retteý jáne aýyz sý sapasyn arttyrýǵa baǵyttalmaq.
Jańa ǵylymi ortalyq
DDU-nyń Týberkýlez máseleleri jónindegi bólimshesin Kopengagennen Almatyǵa kóshirý jospary da talqylandy. Ortalyq Infektsiialyq aýrýlar ulttyq ǵylymi zertteý institýtynyń bazasynda jumys istemek.
Bul bastamalar Qazaqstannyń densaýlyq saqtaý salasyn jańǵyrtýǵa, halyqaralyq yntymaqtastyqty kúsheitýge jáne halyqqa kórsetiletin meditsinalyq kómektiń sapasy men qoljetimdiligin arttyrýǵa baǵyttalǵan.
