Elimizde keshe ótken Májilis pen máslihat depýtattary sailaýynyń ótý barysyna táýelsiz halyqaralyq baiqaýshylar baǵa berip jatyr, dep habarlaidy "Ult aqparat".
«Missiia músheleri sailaý kúni daýys berý sáti bastalǵannan, daýysty sanaýǵa deiingi protsesti qadaǵalady. Sailaý barysyn qadaǵalaý Nur-Sultan qalasy men Qazaqstannyń basqa da óńirlerinde júzege asyryldy. Sonymen qatar ShYU-nyń missiia músheleri Qytaidaǵy Qazaqstannyń elshiliginde sailaýdyń ótý barysyna monitoring júrgizdi. Sailaý kúni qarsańynda jáne sailaý kúni bizdiń ókilder barlyǵy 118 sailaý ýchaskesine bardy. Sailaý ýchaskelerinde jumys barlyq talaptarǵa sai júrgizildi», - dedi Shanhai yntymaqtastyq uiymy bas hatshysynyń orynbasary, missiia basshysy Chjan Haichjoý elordada táýelsiz halyqaralyq baiqaýshylardyń qatysýymen ótken baspasóz máslihatynda.
Onyń aitýynsha, sailaý kezinde daýys berýshilermen qatar baiqaýshy jáne BAQ ókilderine teńdei jaǵdai jasalǵan.
«Jalpy sailaý protsesi jáne sailaý komissiiasynyń jumysy ashyq ári ádiletti túrde ótti. Baiqaýshylardyń suraqtary men ótinishterine sailaý ýchaskelerinde ýaqytyly jaýap berilip otyrdy. Taǵy bir erekshe aityp ótetin sát, sailaýaldy jumystar jáne sailaýdyń ótý barysy BAQ betterinde keńinen nasihattaldy. Qazaqstan demokratiialyq damý jolynda taǵy bir nyq qadam jasady. ShYU missiiasy atynan Qazaqstannyń memlekettik, ekonomikalyq –áleýmettik odan ári damýyna sáttilik tileimin», -dedi ol.
