Foto:elements.envato.com
Májiliste Halyqaralyq qaita qurý jáne damý bankinen 11,5 jylǵa 345,7 million eýro kóleminde nesie alýdy qarastyratyn zań jobasy qaralyp jatyr, - dep habarlaidy Tengrinews.kz tilshisi.
Zań jobasyna sáikes, nesie "jeke sektor basqaratyn damý saiasatyn qarjylandyrýǵa jáne ekonomikany turaqty qalpyna keltirýge" arnalǵan.
"Osy kelisim boiynsha nesie qarajaty respýblikalyq biýdjet tapshylyǵyn qarjylandyrý sharalary aiasynda áleýmettik-ekonomikalyq jaǵdaidyń turaqtylyǵyn saqtaýǵa baǵyttalǵan sharalar keshenin qoldaý úshin tartylady.
Qazaqstanǵa Halyqaralyq qaita qurý jáne damý bankinen 345,7 million eýro somasynda nesie beriledi. Ótelý merzimi 11 jyl 6 ai, onyń ishinde 2,5 jyl jeńildik kezeńimen", - dedi depýtat Marat Qusaiynov Májilis otyrysynda.
Depýtattar bul usynysty qoldady. Endi Májilistiń Qarjy jáne biýdjet komiteti zań jobasyn zerdelep, qorytyndy ázirleýi kerek.
