Premer-Ministrdiń orynbasary - Syrtqy ister ministri Muhtar Tileýberdi Jenevada ótip jatqan BUU Adam quqyqtary jónindegi keńesiniń (BUU AQK) 46-shy sessiiasynyń joǵary deńgeidegi segmenttiń onlain-otyrysyna qatysty, dep habarlaidy QR SIM baspasóz qyzmeti.
Is-sharaǵa BUU-nyń Adam quqyqtary jónindegi Joǵarǵy komissary Mishel Bachelet, 150-den astam eldiń úkimet basshylary men ministrleri, sondai-aq halyqaralyq uiymdardyń ókilderi qatysty.
M.Tileýberdi óz sózinde Táýelsizdigimizdiń 30 jyldyǵynda el damýynyń negizgi basymdyqtarynyń biri Tuńǵysh Prezident - Elbasy Nursultan Nazarbaevtyń adam quqyqtary salasyndaǵy ulttyq jáne halyqaralyq standarttardy saqtaýǵa arnalǵan baǵyty bolyp qala beretinin atap ótti.
Syrtqy saiasi vedomstvosynyń basshysy qatysýshylardy Prezident Qasym-Jomart Toqaevtyń adam quqyqtaryn qorǵaý, demokratiialyq qoǵam qurý jáne «Halyq únine qulaq asatyn memleket» tujyrymdamasyn engizý bóliginde bastamashylyq etken saiasi reformalar paketin iske asyrýdyń tabysty tájiribesi týraly habardar etti. Atap aitqanda, beibit jiyndar týraly jańa zańnyń qabyldanýy, jala jabýdy qylmystyq sipattan aryltý, qylmystyq kodekstiń jekelegen baptaryn izgilendirý, áielder men jastar úshin 30% sailaý kvotasyn engizý, sondai-aq Qazaqstannyń ólim jazasynyń kúshin joiý týraly ekinshi Fakýltativtik Hattamasyna qosylýy ózekti jetistikter qatarynda atap ótildi.
M. Tileýberdi Qazaqstannyń beibitshilikti, kelisimdi nyǵaitý jáne adamnyń irgeli quqyqtaryn qamtamasyz etý boiynsha ujymdyq jahandyq kúsh-jigerge barynsha úles qosýǵa beiildiligin rastady. Osyǵan bailanysty ol Qazaqstannyń 2022-2024 jyldarǵa arnalǵan BUU AQK músheligine ótinimin jariialap, onyń halyqaralyq qoǵamdastyqtyń tarapynan qoldaýyna úmit bildirdi.
