Qazaqstan álemdegi biznes júrgizýde barynsha qolaily jaǵdaiy bar TOP-20 eldiń qataryna kirýi tiis. Bul týraly Májilistegi «Nur Otan» partiiasy parlamenttik fraktsiiasynyń keńeitilgen otyrysynda Úkimet basshysy Asqar Mamin aitty, dep habarlaidy QazAqparat.
«Myqty kásipkerlik sanatty qalyptastyrý jónindegi jańa ádisterdi júzege asyrý nátijesinde 2025 jylǵa qarai shaǵyn jáne orta bizneste jumyspen qamtylǵandar sany 4 mln adamǵa jetkiziledi. Jyldyq ósim 100 myń adamdy quraidy. Biyl shaǵyn jáne orta bizneste jumyspen qamtylǵandardyń sany 3,6 mln adamǵa jetedi. Bul rette biyl JIÓ-degi ShOB úlesi 30,5 paiyzǵa artyp, 2025 jylǵa qarai atalǵan kórsetkishtiń máni 35 paiyzdy quraityn bolady», - dedi Úkimet basshysy «Nur Otan» partiiasynyń «Ózgerister joly: ár azamatqa laiyqty ómir!» Sailaý baǵdarlamasyn oryndaýdyń Jol kartasyn talqylaý barysynda.
Onyń aitýynsha, ekonomikany odan ary indýstriialandyrý aiasyynda óńdeý ónerkásibiniń óndiris kólemi 1,5 ese artady. 2021 jyly ósim 10,8 paiyzdy qurap, 2025 jylǵa deiin jyl saiynǵy ósimmen 51 paiyzǵa deiin jetkiziledi.
«Iskerlik ortany jetildirý jónindegi júieli sharalardyń nátijesinde Qazaqstan álemdegi biznes júrgizýde barynsha qolaily jaǵdaiy bar TOP-20 eldiń qataryna kirýi tiis. 2025 jylǵa deiin jeke biznes ashý úshin 50 myń azamatqa, onyń ishinde 42 myń aýyl turǵynyna jalpy somasy 250 mlrd teńge bolatyn shaǵyn kredit beriledi. Biyl shaǵyn nesie 8 myń azamatqa berilip, 2025 jylǵa qarai 12 myń adamǵa deiin keńeitiledi. Shikizattyq emes eksport kólemi 2 ese, 41 mlrd dollarǵa deiin artady. 2021 jyly atalǵan kórsetkishtiń máni 29 mlrd dollardan asyp túsedi», - dedi Premer-Ministr.
