Qazaqstan osy jyly 69 mln tonna munaidy eksportqa shyǵarýdy josparlap otyr. Bul týraly QR Energetika ministri Bolat Aqsholaqov aitty, dep habarlaidy QazAqparat.
«2021 jyldyń qorytyndysy boiynsha munai óndirý kólemi 85,9 mln tonnany, munai eksporty 67,6 mln tonnany qurady. Munai óndirýdiń 2022 jylǵa arnalǵan jospary - 87,5 mln tonna, eksport boiynsha - 69 mln tonna. Teńiz, Qarashyǵanaq jáne Qashaǵan úsh iri munai-gaz jobasy elimizdiń munai óndirý kóshbasshylary bolyp qalýda», - dedi ol ministrliktiń keńeitilgen alqa otyrysynda.
Onyń atap ótýinshe, Teńiz jobasynda 2021 jyly munai óndirý 26,5 mln tonnany, gaz óndirý kólemi 14,5 mlrd tekshe metrdi qurady.
«Ken ornynda quny 45,2 mlrd AQSh dollaryn quraityn Keleshekte keńeitý jobasy iske asyrylýda. Bul munai óndirýdi jylyna 12 mln tonnaǵa ulǵaitýǵa múmkindik beredi. 2021 jyldyń qorytyndysyna sáikes joba boiynsha jumystardyń jalpy ilgerileýi 89 paiyzdy, 2022 jylǵa arnalǵan jospar 97,4 paiyzdy qurady. Jobany 2023 jyly aiaqtaý josparlanyp otyr», - dedi ministr.
Bolat Aqsholaqovtyń aitýynsha, 2021 jyldyń qorytyndysynda Qashaǵanda munai óndirý kólemi 16,2 mln tonna, al gaz óndirý kólemi 9,8 mlrd tekshe metr boldy.
«Ótken jyly qýaty 1 mlrd tekshe bolatyn gaz óńdeý zaýytynyń qurylysy bastaldy. 2022 jyly osy gaz óńdeý zaýytynyń qurylys-montajdaý jumystarynda 40 paiyz progreske qol jetkizý josparlanyp otyr. Tolyq qýatqa shyqqan kezde zaýyt 800 mln tekshe kóleminde taýarlyq gaz, 119 myń tonna kóleminde suiytylǵan gaz óndiretin bolady. Sonymen qatar qýaty jylyna 2 mlrd tekshe metr Qashaǵan gaz óńdeý zaýyty jobasyn iske asyrý josparlanýda», - degen ol.
Osy oraida ministr birinshi vitse-ministr Murat Jórebekovke osy jyly bazalyq jobalaýdy bastaý jóninde tapsyrma berdi.
«Qarashyǵanaqta 11,5 mln tonna kóleminde munai, 18,9 mlrd tekshe metr kóleminde gaz óndirildi. Búgingi kúni ken ornynda suiyq kómirsýtekterdi óndirý deńgeiin jylyna 11-12 mln tonna sheginde ustap turý boiynsha jobalar iske asyrylýda. Birinshiden, 2021 jyly quny 1,1 mlrd AQSh dollaryna gaz óńdeý qýatyn arttyrý jobasy iske qosyldy. Ekinshiden, quny 578 mln AQSh dollaryna gazdy keri aidaý 4-shi kompressoryn paidalanýǵa berý úshin iske qosý-jóndeý jumystary júrgizilýde. Úshinshiden, shiki gazdy keri aidaýdyń 5-shi kompressoryn salý jumystary bastaldy. Jobanyń biýdjeti - 970 mln AQSh dollary. Aiaqtalý merzimi - 2025 jyl», - dedi Bolat Aqsholaqov.
