Qazaqstan áskeri paradqa 4 milliard teńgeden astam aqsha jumsap kelgen. Bul týraly qorǵanys ministri Rýslan Jaqsylyqov málimdedi, dep habarlaidy Sputnik Qazaqstan.
Májilis kýlýarynda ministr Qarýly kúshterdiń 30 jyldyǵy qurmetine biyl nege áskeri parad ótpeitinin túsindirdi. Jaqsylyqovtyń aitýynsha, qazir Qazaqstannyń Qarýly kúshteri aldynda mańyzdy mindetter tur. Olardy júzege asyrý úshin qomaqty qarajat qajet.
"Biz jýyrda ǵana oqý-jattyǵýlardy aiaqtadyq. Ne mańyzdyraq – oqý-jattyǵý ótkizip, jaýyngerlik ázirlikti kóterý me, joq álde, parad uiymdastyrý ma? Atalǵan jaǵdaida Joǵarǵy bas qolbasshynyń tapsyrmalaryn oryndaýdy eskerip, dál qazirgi kezeńde jaýyngerlik ázirlik pen Qarýly kúshterdi daiyndaýǵa kóńil bólý aqylǵa qonymdy sheshim dep sanaimyz", - dedi ministr.
Ol Jeńis kúnine josparlanǵan, iaǵni soǵys ardagerlerine qurmet kórsetý sharalary josparǵa sai ótkiziletinin naqtylady. Sonymen qatar, ardagerlerge ákimdik tarapynan tólemder beriledi. Osy oraida jýrnalister bir paradqa biýdjetten qansha teńge bólinip kelgenin surady.
"Bir paradqa ortasha eseppen 4 milliard teńgeden astam aqsha jumsaldy" - dedi Rýslan Jaqsylyqov.
Sondai-aq ol Qazaqstan parad ótkizýden múlde bas tartpaitynyn atap ótti.
"Parad – bul patriottyq sezimdi kórsetýdiń bir túri. Buǵan deiin pandemiia bolǵanyn bilesizder, sherý ótkizýge qajettilik bolmady. Al qazir biz jaýyngerlik ázirlikti kóterýmen ainalysyp jatyrmyz. Kelesi jyly, ekonomikalyq jaǵdai túzelgende, biz paradty ótkizemiz", - dedi qorǵanys ministri.
