Búgin Májilistiń jalpy otyrysynda palata depýtattary «Qazaqstan Úkimeti men Qyrǵyzstan Úkimeti arasyndaǵy eýraziialyq ekonomikalyq integratsiia jaǵdaiynda ekonomikalyq yntymaqtastyqty damytý týraly kelisimdi ratifikatsiialaý týraly» zań jobasyn maquldady, dep habarlaidy Ult.kz tilshisi QazAqparat agenttigine silteme jasap.
«Kelisim 2014 jylǵy 7 qarashada Qazaqstan men Qyrǵyzstan arasyndaǵy Joǵarǵy Memleketaralyq keńes otyrysynyń aiasynda memleket basshylary bergen tapsyrmaǵa sáikes ázirlendi. Qujatqa 2016 jylǵy 28 jeltoqsanda qol qoiyldy. Kelisim normalaryna sáikes, Qazaqstan tarapy Qyrǵyzstannyń Eýraziialyq ekonomikalyq odaqqa integratsiiasy protsesine járdemdesý maqsatynda atalǵan elge 100 mln AQSh dollaryna teń kómek kórsetedi. Kómek qyrǵyz tarapyna Eýraziialyq ekonomikalyq odaqqa qosylýy jónindegi «Jol kartalarynda» kózdelgen sharalardy iske asyrýǵa, atap aitqanda EAEO kedendik shekarasynyń qyrǵyz ýchaskesinde kedendik infraqurylymdy jaqsartýǵa, Qyrǵyzstannyń sanitarlyq, veterinarlyq, fitosanitarlyq júielerin EAEO talaptarymen sáikestendirýge beriledi», - dep toqtaldy QR Ulttyq ekonomika ministri Timýr Súleimenov zań jobasy boiynsha baiandamasy barysynda.
Bul rette kómek tehnikalyq járdemdesý týraly úkimetaralyq jekelegen hattalamalarǵa sáikes, kezeń-kezeńmen aqsha qarajattary, taýarlar, mamandardy oqytý túrinde beriletin bolady.
Onyń sózine qaraǵanda, kezekti kómek berý transhyn qalyptastyrý maqsatynda Qyrǵyzstan jaǵy sharalar tizbesin, sonymen qatar kómektiń negizdiligin rastaityn qujattardyń bolýy týraly qorytyndyny usynady.
«Usynylǵan kómektik maqsatqa sai jáne tiimdi jumsalýyn baqylaý baǵytynda Qazaqstan-Qyrǵyzstan úkimetaralyq keńesi aiasynda birlesken ekijaqty Tekserý komissiiasy qurylady. Tutastai alǵanda, memlekettik shekaranyń qazaq-qyrǵyz ýchaskesinde veterinarlyq baqylaýdy alyp tastaý boljamyn eskersek, Eýraziialyq ekonomikalyq odaqtyń syrtqy sulbasynda qyrǵyz ótkizý beketterin jaraqtandyrý úderisine barynsha kómek kórsetýge Qazaqstan múddeli ekenin aita ketý kerek. Bul óz kezeginde Qazaqstan aýmaǵyna kórshi elden jáne EAEO-nyń basqa da elderinen ákelinetin taýarlardyń qajetti qaýipsizdik deńgeiin qamtamasyz etýge múmkindik beredi», - dedi Súleimenov.
