Qazaq kúresinen «Qazaqstan Barysy» respýblikalyq týrnirin «Qazaqstan» jáne «Qazsport» telearnalary tikelei efirde kórsetedi, dep habarlaidy QazAqparat tilshisi.
8 maýsymda Nur-Sultan qalasy «Barys-arena» muz aidynynda QR tuńǵysh Prezidenti júldesi úshin qazaq kúresinen «Qazaqstan barysy» respýblikalyq týrniri ótedi. Jarys kúni saǵat 13:00-de jerebe tartý rásimi ótip, sondai-aq kontserttik baǵdarlama men tamasha shoý uiymdastyrylmaq.
Uiymdastyrýshylar osy ýaqytqa deiin aitqandai, finaldyq básekede elimizdiń túkpir-túkpirinen kelgen 35 balýan beldesedi. Biylǵy jarystyń júlde qory da qomaqty. Jeńimpazǵa 25 million teńgeden bólek, altyn belbeý men altynnan quiylǵan aýyspaly «Taituiaq» tabys etiledi. II jáne III orynǵa ie bolǵan sportshylarǵa sáikesinshe 5 million 500 myń jáne 1 million 800 myń teńge beriledi. Sonymen qatar palýandarǵa ár jeńisi úshin 100 myń teńge aqshalai syilyq tabystalady.
«Elordada ótetin saiysty «Qazaqstan» jáne «Qazsport» telearnalarynan 8 maýsym kúni saǵat 12:45-ten bastap kórýge bolady», - dep habarlaidy «Qazaqstan» RTRK baspasóz qyzmetinen.
QR qazaq kúresi federatsiiasynyń prezidenti Arman Shoraev atalmysh saiysta qai balýandardyń qatysatynyn aitqan edi.
«Byltyr «Qazaqstan barysy» atanǵan palýanymyz Erjan Shankeev biylǵy týrnirge eshqandai irikteýsiz qatysady. Aibek Nuǵymarov ta Shyǵys Qazaqstan oblysynan irikteýden ótti. Jobamyz áleýmettik liftige ainalsa eken dep jumysty qolǵa aldyq. Qudaiǵa shúkir, oiymyz júzege asty. Balýanymyz Aibek Nuǵymanov Semei qalasyndaǵy eń úlken kolledjdiń direktory bolyp taǵaiyndaldy. Beibit Ystybaev baýyrymyzda dál solai. Ol óziniń týǵan jeri Jambyl oblysynda basshylyq qyzmette. Osy jigitter juldyzǵa ainalyp, tanymaldylyqqa ie boldy. Qudaiǵa shúkir maqsatymyzǵa jettik», - dedi Arman Shoraev.
