QR Bilim jáne Ǵylym ministrliginiń bastamasymen qolǵa alynǵan «Qazaqstan balalary – sheksiz álemde!» respýblikalyq shyǵarmashylyq kinofestivali Ońtústik Qazaqstan oblysynda uiymdastyrylyp otyr, dep habarlaidy "Ult aqparat".
Úzdik klassikalyq jáne zamanaýi óner úlgilerin igerý, daryndy balalardy qoldaý, sol arqyly oqýshylardyń tulǵalyq rýhani mádenietin qalyptastyrýdy maqsat etken bul shara Elbasynyń «Bolashaqqa baǵdar: rýhani jańǵyrý» baǵdarlamasynda aitylǵan «Daryndylar eli» jobasy negizinde iske asyrylýda. Festivalge 160 úmitker kez-kelgen janrdaǵy qysqametrajdy filmderin, shyǵarmashylyq sheshimi bar derekti, animatsiialyq jáne áleýmettik rolik, mýzykalyq filmderin usynǵan.
Shymkent qalasyndaǵy «Qazaqstan halqy Assambleiasy» ǵimaratynda festivaldiń ashylý saltanaty ótti. Jiynda oblys ákiminiń orynbasary Ulasbek Sádibekov quttyqtaý sóz sóilep, festivalge qatysýshylarǵa aq jol tiledi.
– Festival barysynda respýblikanyń barlyq óńirinen kelgen balalar men jastarǵa shyǵarmashylyq ujym qalyptastyryp, ony damytýǵa jáne aralarynda qyzyqty da mándi qarym-qatynas ornatýǵa, sondai-aq, kino óneriniń kásibi qairatkerlerimen tanysýǵa múmkindik týyp otyr. Búgingi festivalge oblystyq jáne Astana, Almaty qalalyq kezeńderiniń jeńimpazdary qatysyp otyr. Turǵyndarynyń 30 paiyzynan astamyn jastar quraityn Ońtústik óńirinde uiymdastyrylǵan baiqaý erekshe kóńil-kúi syilaidy dep senemin, – dedi ol.
Aita keteiik, festival barysynda «Erekshe bilim berýdi qajet etetin balalardyń» qolóner buiymdary jármeńkesi uiymdastyrylyp, oǵan «Qamqorlyq» jobasy sheńberinde óńirdegi kolledj ujymdary erekshe atsalysty. Kelýshiler Ońtústikten shyqqan kinoakterleriniń fotosýret kórmesi men «Ońtústikfilm» kinostýdiiasynyń taqyryptyq beinefilmin tamashalady.
Festival eki kúnge jalǵasady. Jeńimpazdar diplomdarmen, arnaiy sertifikattarmen marapattalatyn bolady.
