Qazaqstan Úkimeti Birikken Arab Ámirlikteri men Qatardyń tórt sheihine 2019 jylǵy qazan men qarasha ailarynda el aýmaǵyndaǵy qoryqtarda itelgimen daraq jek dýadaq aýlaýǵa resmi ruqsat berdi. Bul týraly Premer-ministr Asqar Mámin qol qoiǵan Úkimet Qaýlysy Qazaqstannyń normativtik quqyqtyq aktileriniń aqparattyq-quqyqtyq júiesi saitynda jariialandy.
Qaýlyǵa sáikes, BAÁ sheihi Halif Bin Zaed ál-Nahaianǵa suńqarmen Túrkistan oblysyndaǵy Arys jáne Qarataý qoryǵynyń aýmaǵynda 43 dýadaq jáne Jambyl, Qyzylorda men Túrkistan oblystaryndaǵy Ońtústik Qazaqstan qoryǵynda 90 dýadaq aýlaýǵa ruqsat berilgen.
BAÁ-niń taǵy eki sheihi – Sýrýrý jáne Seif Bin Muhammed ál-Nahaiannyń árqaisy Mańǵystaý oblysyndaǵy Kendirli – Qaiasan qoryǵynan 43 dýadaq aýlaýǵa ruqsat alǵan.
Qatar sheihi Jasem Bin Hamad Bin Halifa ál-Tanige Jambyl oblysyndaǵy Ańdasai qoryǵy aýmaǵynda 27 dýadaq jáne Almaty men Jambyl oblystaryndaǵy Jýsandala qoryǵynda 30 dýadaq aýlaýǵa ruqsat berilgen.
Úkimet Almaty, Jambyl, Qyzylorda, Mańǵystaý jáne Túrkistan oblystary ákimderine sheteldikterge "qajetti járdem kórsetý", al keden qyzmetine Qazaqstanǵa sheihter saiatshylyq maqsatymen ákeletin jáne áketetin itelgilerdi tiisti tártip boiynsha rásimdeýdi tapsyrǵan.
Sheihter Qazaqstan aýmaǵynda aýlaǵan ár qusqa el biýdjetine 260 ailyq eseptik kórsetkish (656 600 teńge nemese 1700 dollar) kóleminde aqsha tóleýi tiis.
Qazaqstanda dýadaq joiylýǵa shaq turǵan sirek qus retinde Qyzyl kitapqa engizilgenimen Úkimet talai jyldan beri sheteldik sheihterge ony aýlaýǵa ruqsat berip keledi.
