QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda azyq-túlik qaýipsizdigin qamtamasyz etý jáne taýar súiemeldeý júiesin qurý máseleleri qaraldy, dep habarlaidy "Ult aqparat" primeminister.kz saityna silteme jasap.
«Qazaqstan ulttyq taýar ótkizý jelisin — kóterme-taratý ortalyqtary keshenin (KTO) qurý arqyly azyq-túlik qaýipsizdigin qamtamasyz etý men baǵany baqylaýdyń jańa deńgeiine ótpek. Osyǵan uqsas júieler damyǵan elderde sátti jumys istep tur, Frantsiia, Ispaniia jáne basqa da memleketterdiń tájiribesi egjei-tegjeili zerdelendi.
Ulttyq taýar ótkizý júiesin qurý jobasy 2022 jylǵa deiin úsh kezeńde iske asyrylady jáne 24-ten asa kóterme-taratý ortalyǵy salynady. Bul shamamen 4,8 mln tonna agroónimdi saqtaýǵa, óńdeý men taratýǵa múmkindik beredi. Jasalyp jatqan infraqurylym jinalǵan jemis-kókónis ónimderiniń tolyq saqtalýyn qamtamasyz etýge jáne shyǵyndy azaitýǵa jol ashady. Sonyń nátijesinde aýyl sharýashylyǵy taýaryn óndirýshilerdi óz óndirisin ulǵaitýǵa yntalandyrady. Búgingi tańda jemis-kókónis qoimalarynyń tapshylyǵy 70% quraidy.
Biyl Pavlodar, Almaty jáne Túrkistan oblystarynda 5 kóterme-taratý ortalyǵy iske qosylady, bul qosymsha 600 myń tonna aýyl sharýashylyǵy ónimin saqtaýǵa múmkindik beredi» - dedi Premer-ministr.
Úkimet basshysy barlyq óńirlerde damyǵan kóterme-taratý ortalyqtary jelisiniń bolýy maýsymaralyq kezeńdegi azyq-túlik tapshylyǵy máselesin de sheshetinin, naryqta ónim jetkilikti bolsa, onyń baǵasy da óspeitinin atap ótti. Sonymen qatar, naqty qurylǵan taýardy ótkizý jelisi qajetsiz deldaldardy shektei otyryp, tsifrlyq tehnologiialardy engizý arqyly árbir kezeńde qosylatyn baǵany baqylaýǵa jol ashady.
«Kóterme-taratý ortalyqtaryn iske qosqanda birinshi kezeńniń ózinde baǵa belgileýdiń ashyqtyǵy men jańa tiimdi saýda mehanizmderiniń arqasynda biz agrarlyq ónim baǵasy 25%-ǵa deiin tómendeidi dep boljap otyrmyz.
Sondyqtan naqty mynadai tapsyrma beremin: birinshiden ákimdikter kóterme-taratý ortalyqtaryna jer ýchaskelerin berip, olarǵa qajetti infraqurylymdy jetkizýdi tapsyramyn. Sondai-aq keńeitý jáne jańa óndiristerdi qurýǵa jeke sektordy tartý múmkindigin qarastyrý qajet. Saýda jáne integratsiia ministrligi ákimdiktermen birlesip, kóterme-taratý ortalyqtarynyń birinshi kezeńin iske qosýdy qamtamasyz etsin. Úshinshiden Saýda jáne integratsiia ministrligi men Aýyl sharýashylyǵy ministrligi ákimdiktermen birlesip, aýyl sharýashylyǵy taýaryn óndirýshilermen ónimdi kóterme-saýda ortalyqtaryna jetkizý máselesin pysyqtasyn», — dedi Mamin.
Aita keteiik, jobany iske asyrý jospary týraly saýda jáne integratsiia ministri B. Sultanov, aýyl sharýashylyǵy ministri S. Omarov, Túrkistan oblysynyń ákimi Ó. Shókeev, Almaty oblysynyń ákimi A. Batalov jáne Pavlodar oblysynyń ákimi Á. Sqaqov baiandady.
