Qazaqstan Azov teńizindegi shielenisti odan ary ýshyqtyrmaýǵa shaqyrdy. Bul týraly búgin QR Syrtqy ister ministrliginiń resmi ókili Aibek Smadiiarov aitty, dep habarlaidy "Ult aqparat".
«Qazaqstan Azov teńizinde oryn alǵan jaitqa bailanysty alańdaýshylyq tanytady. Kerch buǵazy arqyly azamattyq kemelerdiń ótýiniń qaita jańǵyrýyn qoldaimyz. Biz taraptardy barynsha jaýapkershilik tanytyp, jaǵdaidyń odan ary ýshyǵýyna jol bermeýge shaqyramyz. Eń aldymen mundai jaittardyń aldyn alý jáne retteý tetikteri qajet», - dedi Aibek Smadiiarov.
Sonymen qatar SIM ókili eki taraptyń arasynda senimdi qalpyna keltirý qajettigine basa nazar aýdardy.
«BUU Qaýipsizdik keńesi búgin keńester barysynda oryn alǵan jaitty talqylamaq. Qazaqstan óz kezeginde Azov teńizindegi jaǵdaidy odan ary ýshyqtyrmaýǵa baǵyttalǵan usynystardy qoldaityn bolady», - dedi Aibek Smadiiarov.
Buǵan deiin habarlaǵanymyzdai, Ýkraina men Reseidiń ótinishimen BUU Qaýipsizdik keńesiniń shuǵyl otyrysy ótedi.
Eske salsaq, Resei shekarashylary Qara teńizde Ýkraina áskeri-teńiz kúshteriniń «Berdiansk», «Nikopol» jáne «Iany Kapý» kemelerin ustady. RF Federaldyq Qaýipsizdik qyzmetiniń qoǵammen bailanys ortalyǵy málimetinshe, ýkrainalyq kemeler Reseidiń territorialdyq teńiz aýmaǵynda «zańsyz áreket jasamaq bolǵan» jáne qozǵalysty dereý toqtatý týraly talaptardy oryndamaǵan.
Al Ýkrainform aqparatyna sáikes, reseilik áskeriler Kerch buǵazynda Ýkraina Áskeri teńiz kúshterine tiesili úsh kemeniń qozǵalysyna tosqaýyl qoiyp, olarǵa oq jaýdyrǵan.
