Qazaqstan ázerbaijandyq bankten zeinetaqy qarjysyn qaitarý sharttaryn anyqtaidy. Bul rette elimiz qaryzdy qaita qurylymdaý baǵytyndaǵy úsh nusqanyń birin tańdap alýy tiis, dep habarlaidy Ult.kz tilshisi QazAqparat agenttigine silteme jasap.
«Daýys berý protsedýrasy taiaý ýaqytta ashylýy tiistigin atap ótkim keledi. Bul ázerbaijandyq tarap ótkizetin ishki protsedýralarǵa, sotqa bailanysty. Úkimet te, Ulttyq bank te qaita qurylymdaý táýelsiz qundy qaǵazdarǵa aiyrbas arqyly júrgizilýi tiistigin qoldaidy. Iaǵni, Qazaqstan Respýblikasynda shyǵarylǵan qundy qaǵazǵa jáne soǵan sáikes biz iriktep alǵan optsiia bolady. Bul Ázerbaijannyń memlekettik qundy qaǵazdaryn, 5 protsenttik mólsherlememen 7 jylǵa alýdy kózdeidi. Biz muny barynsha ońtaily nusqa dep esepteimiz. Degenmen aqsha jaǵynan úsh nusqa birdei», - dedi QR Ulttyq banki tóraǵasy Daniiar Aqyshev Astana ekonomikalyq forýmy aiasynda uiymdastyrylǵan brifing barysynda.
Esterińizge sala ketsek, Úkimet otyrysynda dál osy máselege qatysty QR Qarjy ministri Baqyt Sultanov Premer-Ministr Baqytjan Saǵyntaevqa esep bergen bolatyn.
«Bizdiń basty maqsatymyz jaǵymsyz saldarlardy meilinshe azaitý jáne BJZQ salymshylarynyń múddesin qorǵaý, sonymen qatar 250 mln dollar somasyndaǵy negizgi qaryzdyń saqtalýyn qamtamasyz etý. Kelissózder barysyndaǵy bizdiń basty ustanymymyz osyndai. 23 mamyrda Londonda ótken kezdesýde qaryzdy qaita qurylymdaýdyń úsh nusqasy aityldy. Ázerbaijan bankiniń 250 mln dollar somasyndaǵy mindettemelerin 5,125 protsenttik mólsherlememen 12 jyldyq merzimge 200 mln dollar bolatyn Ázerbaijannyń memlekettik baǵaly qaǵazdaryna almastyrý. Ekinshi nusqa - 250 mln dollarǵa para-par 3,5 protsenttik mólsherlememen 15 jylǵa Ázerbaijannyń memlekettik baǵaly qaǵazdaryna almastyrý. Úshinshi nusqa - osy banktiń 250 mln dollar turatyn jańa shyǵarylǵan obligatsiialaryn 3,5 protsenttik mólsherlememen 7 jylǵa alý. Barlyq nusqalardy taldai otyryp, QR Ulttyq banki men Úkimeti ókilderinen quralǵan komissiia Qazaqstan salymshylary úshin eń tiimdi nusqany tańdap alady», - dep atap ótken edi B. Sultanov.
