Foto: ashyq derekkóz
Bakýde Qazaq kinosynyń ailyǵy bastaldy. Saltanatty is-shara «Dos-Muqasan» mýzykalyq dramasymen ashyldy. Rejisser Aidyn Sahamannyń filmi eldiń mýzyka ónerine jańa serpin bergen, qazaq rokynyń negizin qalaýshy tanymal qazaqstandyq ansamblge arnalady, dep habarlaidy Ult.kz.
Is-shara aiasynda ázerbaijandyq talantty ánshiler men mýzykanttardyń qatysýymen kontserttik baǵdarlama uiymdastyrylyp, bul kesh qos halyq arasyndaǵy mádeni bailanystyń aiqyn kórinisine ainaldy.
Keshke Qazaqstan Respýblikasynyń Ázerbaijan Respýblikasyndaǵy Tótenshe jáne Ókiletti Elshisi Álim Baiel, shyǵarmashylyq jáne ǵylymi ziialy qaýym ókilderi, diplomatiialyq korpýs músheleri, BAQ, Bakýde turatyn qazaqstandyqtar men qazaq kinosyn qoldaýshylar qatysty.
«Dos-Muqasan» filmi Efrat Sháripovtiń stsenariii negizinde QR Mádeniet jáne aqparat ministrligi men Ulttyq kinony qoldaý memlekettik ortalyǵynyń qoldaýymen túsirilgen. Týyndynyń prodiýseri – Aigúl Baibek.
Film jelisi politehnikalyq institýttyń stýdentteri qurǵan ansambl tarihyn baiandaidy. Jas mýzykanttardyń óner men ǵylym arasyndaǵy kúrdeli tańdaýy, kontsertterge tyiym salý, partiia tarapynan qysym, oqý ornyndaǵy qiyndyqtar sekildi shynaiy ómirlik kedergiler kórinis tabady.
Kinotýyndyda keiipkerlerdiń tarihi beinesin dál berý úshin akterler naqty prototipterge sai tańdalǵan. Týyndynyń tarihi shyndyqqa sai bolý úshin ansambl músheleri Murat Qusaiynov pen Dosym Súleimenov arnaiy keńesshi retinde shaqyrylǵan.
Baký qalasynda ótip jatqan Qazaqstan kinosy ailyǵy aiasynda elimizdiń zamanaýi kinoóneriniń san qyryn tanytatyn basqa da týyndylardyń kórsetilimi josparlanǵan.
