Qazaqstan azamattyq belsendilik pen áielder quqyǵyn keńeitý arqyly demokratiiany nyǵaitýda - The Washington Times

Amerikalyq «Washington Times» gazetiniń seisenbi kúngi sanynda Qazaqstandaǵy demokratiialyq qoǵamnyń qalyptasýy, Prezident Qasym-Jomart Toqaevtyń saiasi baǵyty jáne AQSh pen Qazaqstan arasyndaǵy qarym-qatynas týraly maqala jaryq kórdi.

Maqalada biyl tamyz aiynda bolatyn eldiń basqarýshy partiiasy «Nur Otan» partiiasynyń praimerizine airyqsha nazar aýdarylǵan. Onda eldegi ashyq saiasi básekelestik, jastar men áielderdiń qoǵam ishinde jáne bilik arasyndaǵy belsendiligin arttyrý baǵytynda qabyldanǵan sharalarǵa oń baǵa berilgen.

Avtordyń sózinshe, bul reformalardyń qabyldanýy úshin Prezident Qasym-Jomart Toqaev depýtattar men saiasi oppozitsiia aldynda naqty dálelder keltire aldy. Mysaly, basqarýshy partiia quramyna ashyq sailaý ádisi Qazastan tarihynda alǵash ret bolmaq. Bul kandidattar men halyq arasyndaǵy túsinistiktiń damýyna áser etedi. Sondai-aq, sailaý barysy zańmen bekitilgen qatań talaptar tóńireginde ótetin bolady.

Sonymen qatar, elde alǵash ret kandidattar arasynda mindetti qoǵamdyq pikirtalastar ótedi. Bul sailaý barysynda halyq úshin naqty sheshim qabyldaýǵa óz septigin tigizedi.

Maqalada basty nazar aýdarylǵan taǵy bir másele sailaý kezinde jastar men áielderge beriletin kvotalar. Iaǵni, partiiaǵa irikteý barysynda áielder úshin 30 paiyz, al jastardyń úles salmaǵy 20 paiyzdan kem bolmaýy tiis. «Nur Otan» partiiasynyń bastamasymen engizilgen bul ózgerister qoǵamdaǵy áielder quqyǵy men olardyń azamattyq belsendiligin arttyrýǵa kómektesse, jastar úshin demokratiialyq sailaý protsesine qatysyp, jas býyn ókilderine eldiń saiasi jumystaryna belsendi aralasýyna múmkindik beredi.

Avtor mundai bastamalar Eýropanyń birneshe memleketterinde burynnan qalyptasqanyn aitady. Al Qazaqstan sekildi Ortalyq Aziiada ornalasqan memleket úshin mundai reformalar eldiń de, óńirdiń de demokratiialyq baǵytyn qalyptastyrýǵa úlken septigin tigizedi deidi.

Aita ketsek, maqala avtory Djessi Djein Daff, AQSh teńizdegi jaiaý ásker korpýsynyń 20 jyldyq eńbek ótili bar ardageri, Londondaǵy saiasi zertteýler ortalyǵynyń qyzmetkeri jáne Tramp Ardagerler keńesiniń teń tóraǵasy