Qazaqstan azamattyǵyn alǵan 13 jastaǵy qyzdy qytaiǵa qorqytyp shaqyrtyp, qamap tastap otyr. Týǵan qyzynan airylyp otyrǵan ana osylai dep zar jylady. Videony belgili telejúrgizýshi Sáýle Ábildahanqyzy óziniń Facebook áleýmettik jelisindegi paraqshasyna jariialady.
13 jastaǵy Dinara Erǵalidi biyl aqpan aiynyń 2-si kúni Qytaiǵa bopsalap alyp ketipti.
«13 jastaǵy qyzdyń ne jazyǵy bar? Qyzymyz - Qazaqstan azamaty. Aldyndaǵy 2 baýyryn tutqyndaimyz dep bizge zorlyq kórsetip qyzdy shaqyrtqan. Endi "saiasi úirený" degen jerge aparyp qamap qoidy. Ne degen azap mynaý? Qańǵyǵan qazdai, qonǵan torǵaidai bop qaldyq», - degen ana Qazaqstan biliginen kómek surady.
Keiýanyń jalǵyz baǵýshysy, uly Erbol Erǵali da 7 ai buryn Qytai biligi tutqynǵa alǵanyn aitady.
«Balamnyń 4 jáne 1 jasar uly bar. 22 jastaǵy kelinshegi bar. Ne jazyǵy bar balamnyń? Qytaiǵa ne jamandyq istedik?», - deidi kóz jasy kól bolǵan ana.
Aita keteiik, sońǵy kezderi Qytai biligine narazylyq tanytatyn oralmandar sany kún sanap kóbeiip keledi. Buǵan deiin dál osy aspan asty elinen qashyp kelgen Sairagúl Saýytbai shekarany zańsyz kesip ótti degen aiyppen tutqyndalǵan. Elge kelý sebebi, onyń munda nekeli jary men kámelettik jasqa tolmaǵan balalarynyń bolýy. Sairagúldiń jary kelinshegin qamaýǵa alsa da, jazasyn Qazaqstan túrmesinde ótese dep otyr.
