Májilis depýtaty Pavel Kazantsev basqa elden keletin júk kólikteriniń Qazaqstannyń zańyna baǵynbaýynan biýdjetke edáýir qomaqty qarajat túspei jatqanyn málimdedi, dep habarlaidy QazAqparat.
«Erejege baǵyna qoimaityn júk tasymaldaýshylar bar. Máselen olar «Qazaqstan arqyly basqa elge taýar apara jatyrmyz» deidi de, tranzit – tranzitpen aiaqtalmai, júk bizdiń eldiń aýmaǵynda qalyp qoiady. Sol sekildi júk tasymaldaýshylar Qazaqstannyń belgili bir óńirine «osynsha ónim taýar apara jatyrmyz» degenimen, júk ol óńirge jetpei, basqa aimaqqa «sińip» ketedi. Mundai qýlyqtyń arqasynda júk tasymaldaýshy qosymsha qun salyǵy (QQS) men basqa da salyqtardy tólemei, bizdiń elde kóleńkeli ekonomika, jaýapsyz básekelestik, «sur jáne qara ekonomika» gúldeidi. Bulai kete berse, problemalardyń tutas legimen betpe-bet kelemiz. Sol sebepti bul zań jobasynyń basty maqsatynyń biri – osy problemalarǵa jol bermeý», - dedi Parlament Májilisinde depýtat Pavel Kazantsev halyqaralyq avtomobil tasymaldaryn qadaǵalaý týraly zań jobasyn qorǵaý barysynda.
Onyń aitýynsha 2019 jyly Qazaqstanda qosymsha qun salyǵyn tólemegen 60 myńǵa tarta kólik anyqtalǵan. Tranzitpen ketemiz degen 11 myń kólik Qazaqstan aýmaǵynda qalyp qoiǵan.
«Irikteý arqyly taldaý júrgizgen kezde Qazaqstan osy problemalardyń keselinen biýdjetke kelýi tiis 25 mlrd teńgeniń jetpei qalǵany anyqtaldy. Iaǵni osy zań jobasy arqyly máselelelerdi retke keltirsek, eń kem degende biýdjetke 25 mlrd teńge salynyp otyrady. Sonymen qatar Qazaqstan aýmaǵyna kelgen júk kólikteriniń bárin de tártipke baǵyndyra alar edik», - dedi ol.
Eske sala ketsek búgin Parlament Májilisinde «QR keibir zańnamalyq aktilerine halyqaralyq avtomobil tasymaldaryn qadaǵalap otyrý máseleleri boiynsha ózgerister men tolyqtyrýlar engizý týraly» zań jobasy tanystyrylǵan bolatyn.
