Qazaqstan tarapy Aýǵanstannyń sý tasqynynan zardap shekken provintsiialaryna gýmanitarlyq kómek kórsetti, dep habarlaidy "Ult aqparat".
QR Syrtqy ister ministrliginen málim etkendei, búgin Qazaqstannyń Aýǵanstandaǵy Elshisi Álimhan Esengeldiev Qabyl provintsiiasynyń turǵyndaryna gýmanitarlyq kómekti tapsyrý rásimine qatysty. Un, makaron ónimderi, kúnbaǵys maiy jáne qoiýlatylǵan sútten turatyn azyq-túlik 5 myńnan astam muqtaj otbasyna beriletin bolady.
«Is-sharaǵa qatysqan Qabyl provintsiiasynyń gýbernatory Mohammad Iakýb Haidari jáne AIR Tótenshe jaǵdailar jónindegi agenttiginiń tóraǵasy Gýlam Bahaýddin Jilani Aýǵanstan Úkimeti men halqynyń atynan qiyn kezeńde kórsetilgen kómek pen qoldaý úshin rizashylyqtaryn bildirdi.
Elshi óz kezeginde Qazaqstannyń Aýǵanstanǵa dostas qarym-qatynasyn atap ótti. Sonymen qatar, elimiz osy kúrdeli jaǵdaida óńir elderine, sonyń ishinde Aýǵanstanǵa jan-jaqty qoldaý kórsetip otyrǵanyn atap ótti», - delingen aqparatta.
Málim etilgendei, Qazaqstannyń gýmanitarlyq kómegi sýdan zardap shekken 8 provintsiiada taratyldy. Azyq-túlik Qabyldan basqa, Balh, Parvan, Pandjsher, Logar, Vardak, Baǵlan jáne Samangan provintsiialaryna jetkizildi.
