Qazaqstan Úkimeti Aýǵanstan Islam Respýblikasy men Ózbekstan Respýblikasyna gýmanitarlyq kómek kórsetedi. Buǵan qatysty Úkimet basshysy Asqar Mamin qol qoiǵan qaýly «Ádilet» normativtik quqyqtyq aktileriniń aqparattyq-quqyqtyq júiesinde jariialandy, dep habarlaidy "Ult aqparat".
«Qazaqstan Respýblikasynyń Syrtqy ister ministrligi resmi izgilik kómekti alýshylardy aiqyndasyn jáne ony kórsetý jónindegi sharalardy úilestirýdi qamtamasyz etsin. Qazaqstan Respýblikasynyń Indýstriia jáne infraqurylymdyq damý ministrligi izgilik júkti Aýǵanstan Islam Respýblikasy men Ózbekstan Respýblikasyndaǵy mejeli pýnktterge deiin tasymaldaý men jetkizýdi qamtamasyz etsin. Qazaqstan Respýblikasynyń Ulttyq ekonomika, Syrtqy ister, Qarjy, Indýstriia jáne infraqurylymdyq damý ministrlikteri osy qaýlydan týyndaityn sharalardy qabyldasyn» delingen qaýlyda.
Qaýly qol qoiylǵan kúninen bastap qoldanysqa engiziledi.
Aýǵanstan Islam Respýblikasy men Ózbekstan Respýblikasyna resmi izgilik kómek kórsetýge arnalǵan materialdyq qundylyqtardyń tizbesin myna siltemeden kórýge bolady.
