Qazaqstan áýe kompaniialarynyń tabysy 1,5 ese azaidy.
Energyprom.kz málimetinshe, 2020 jyldyń qańtar-maýsymynda elimizdiń áýe kompaniialary 2,3 mln jolaýshy tasymaldady. Bul bir jyl burynǵy kórsetkishten 35,8 paiyzǵa az. Al maýsym aiynda áýe kompaniialary 480,6 myń jolaýshyǵa qyzmet kórsetti jáne karantin kúsheiip turǵan mamyr aiyna qaraǵanda jolaýshylar aǵyny 2,9 esege artty.
2020 jyldyń 1-jartyjyldyǵynda jolaýshylar aǵyny 3,8 mlrd jolaýshy-shaqyrym boldy. Bul bir jyl burynǵy kórsetkishten 1,9 ese kem. Degenmen, maýsymda mamyrǵa qaraǵanda jolaýshylar aǵyny 2 eseden astamǵa artyp, 476,3 mln jolaýshy-shaqyrymǵa jetti.
Osy jyldyń qańtar-maýsymynda áýe kompaniialary 9,6 myń tonna júk pen qol júgin tasymaldady. Degenmen, bul da bir jyl burynǵy kórsetkishten 21,9 paiyz az bolyp otyr. Maýsymda mamyrǵa qaraǵanda júk tasymalynyń kólemi 12,5 paiyzǵa artyp, 1,8 myń tonna boldy.
Áýe kompaniialarynyń jarty jyldyń ishindegi kirisi 99,2 mlrd teńgege jetti. Alaida ótken jyly kompaniialar munan 1,5 ese, iaǵni 170,1 mlrd teńge tabys tapqan bolatyn. Maýsymda áýe kompaniialarynyń kirisi 18,2 mlrd teńgege jetip, mamyrmen salystyrǵanda 2 ese ósim kórsetti.
Jalpy áýe kompaniialarynyń negizgi tabysyn jolaýshylar tasymaly quraidy. Bul kórsetkish jarty jylda 95,1 mlrd teńgeni qurady. Al qalǵan 4,1 mlrd teńge júk pen qol júgin tasymaldaýdan túsken.
