Memleket basshysy Ulttyq ulan aviabazasynyń ashylý rásimine qatysty. Prezident – QR Qarýly Kúshteriniń Joǵarǵy Bas qolbasshysy Qasym-Jomart Toqaevtyń qatysýymen Astana qalasynda Ulttyq ulannyń aviatsiia bazasynyń ashylý rásimi ótti.
Memleket basshysy, eń aldymen, jiynǵa qatysýshylardy aldaǵy Otan qorǵaýshylar kúnimen quttyqtap, bul otanshyldyq sezimdi oiatyp, jaýyngerlik rýhty arttyratyn mártebeli mereke ekenin aitty. Sonymen qatar Qarýly Kúshterdi egemen elimizdiń myqty qalqany, beibitshilik pen turaqtylyqtyń myzǵymas tiregi retinde atap ótti.
"Aviatsiialyq bazanyń ashylýy – Ulttyq ulan ǵana emes, búkil áskerimiz úshin aitýly oqiǵa. Bul baza kúshtik qurylymdardyń áleýetin edáýir arttyrýǵa múmkindik beredi. Ushqyshtardyń shuǵyl áreket etýine jaǵdai jasaidy. Memleket Qarýly Kúshterdi jabdyqtap, áskeri infraqurylymdy damytý máselesin airyqsha nazarda ustaidy", – dedi Qasym-Jomart Toqaev.
Prezident elimizdiń birqatar óńirinde bolǵan alapat tasqynǵa qarsy kúreste sarbazdardyń aldyńǵy shepten tabylyp, antqa adal bolýdyń ozyq úlgisin kórsetkenine toqtaldy.
"Osy oraida men áskeri ushqyshtardyń kásibi turǵydan bilikti jáne sheber áreketin erekshe atap ótkim keledi. Olar zardap shekken aimaqtarǵa gýmanitarlyq júk jetkizdi. Azamattardy qaýipsiz jerge kóshirdi. Sonyń bárin minsiz atqardy. Osyndai qiyn-qystaý kezde halyqpen birge bolǵan sarbazdarǵa zor rizashylyǵymdy bildiremin", – dedi Qasym-Jomart Toqaev.
Prezidenttiń aitýynsha, Qazaqstannyń áskeri qyzmetshileri BUU aiasyndaǵy túrli halyqaralyq missiialarǵa qatysyp, bitimgerlik boryshtaryn tabysty atqaryp keledi. Biyl olar óz mindetterin Golan jotalarynda alǵash ret derbes oryndaýǵa kiristi. Bul áskerimizdiń daiyndyq deńgeiiniń joǵary ekenin jáne elimizdiń álemdik arenadaǵy bedeliniń ósip kele jatqanyn anyq kórsetedi.
"Halqymyz erjúrek jaýyngerlerin qadir tutqan, olarǵa qurmet kórsetken. Men Ulttyq quryltaidyń Atyraýdaǵy otyrysynda Taldyqorǵan qalasyndaǵy áskeri aviabazaǵa jerlesimiz, Keńes Odaǵynyń eki márte batyry Sergei Lýganskiidiń atyn berý týraly tapsyrma berdim. Almatylyq dańqty ushqyshtyń ónegeli ómiri urpaqqa árdaiym úlgi bolýy kerek. Mundai bastama ulttyq áskerimizdiń bedelin arttyra túsetini sózsiz. El úshin jasalǵan erlik eshqashan umytylmaidy", – dedi Memleket basshysy.
Prezident áskeri qyzmetshilerdiń erjúrek batyrlar men dańqty babalardyń jolyn abyroimen jalǵastyryp kele jatqanyn aityp, olardyń Otan aldyndaǵy qyzmetterine tabys tiledi.
Shara barysynda Memleket basshysyna Qarýly Kúshterdiń, basqa da áskeri quramalardyń ushaqtary men tikushaqtarynyń, jaýyngerlik jáne arnaýly tehnikalarynyń jańa úlgileri tanystyryldy.
Sonymen qatar Qasym-Jomart Toqaev aviabazadaǵy birqatar infraqurylymdyq nysandy aralap kórdi. Ishki ister ministriniń orynbasary – Ulttyq ulannyń Bas qolbasshysy Erkin Botaqanov jaýyngerlik tapsyrmalardy óz deńgeiinde oryndaý úshin bazada barlyq jaǵdai jasalǵanyn málimdedi.
Sodan keiin Prezident áskeri qalashyqtyń Dańq zalyna baryp, Qurmetti qonaqtar kitabyna qoltańba qaldyrdy.
Aviabazanyń Astana áýe ailaǵynda ornalasýy jeke quram men tehnikany qajet jerine ýaqytyly jetkizýge múmkindik beredi. Sondai-aq áýeden barlaý júrgizý, zardap shekkenderdi evakýatsiialaý kezinde Ulttyq ulannyń bólimshelerine aviatsiialyq qoldaý kórsetedi.
