Qorǵanys ministrliginde apparattyq keńes ótti. Onyń barysynda taiaý kezeńge mindetter qoiyldy, dep habarlaidy "Ult aqparat".
«Apparattyq keńeste eń aldymen, basshylyq qurammen ótken «Aldaspan-2020» jedel-taktikalyq komandalyq-shtabtyq oqý-jattyǵý qorytyndysy shyǵaryldy. Atalmysh oqý-jattyǵýdy ótkizý barysynda alynǵan tájiribeni belsendi engizýge nusqaý berildi. Bul, eń aldymen, áskerler tobyn qoldaný formalaryna, bólimshelerdiń is-qimyl ádisterine jáne baǵynysty kúshter men quraldardy basqarýdaǵy organdar jumysyna qatysty bolmaq», - delingen QR Qorǵanys ministrliginiń baspasóz qyzmeti málimetinde.
Jeke quramdy aýystyrý úshin arnaiy operatsiialar barysynda áskeri-kólik aviatsiiasyn paidalanýdy jetildirý joldary belgilengen. P arashiýtpen desant túsirýdi qazirgidei tek tikushaqtardan ǵana emes, Qazaqstan armiiasynyń enshisindegi Si-295 ushaqtarynan da júzege asyrý múmkindigin qarastyrý tapsyryldy.
Desanttyq-shabýyldaý áskerleri men Arnaiy operatsiialar kúshteriniń qolbasshylyǵy aldaǵy iri is-sharalar josparlaryn tolyq jáne sapaly iske asyrý jóninde tapsyrma aldy. Bul Tilendiev aýylyndaǵy oqý ortalyǵynda ótetin keshendi bitimgershilik oqý-jattyǵýy men «Altyn jebe» arnaiy operatsiialar kúshteriniń komponentterin tekserý.
«Is-sharalar barysynda nemqurailylyqqa jol berýge bolmaidy, barlyq oqý-jaýyngerlik mindetter tolyq kólemde oryndalýy tiis», - dep atap ótti Qorǵanys ministri Nurlan Ermekbaev.
Keńeste poligondarda atys pen oqý-jattyǵýlardy ótkizý kezinde áskeri qyzmetshiler men halyqtyń qaýipsizdigin qamtamasyz etý boiynsha qosymsha sharalardy engizý jóninde nusqaý berildi.
Qarýly Kúshter basshylyǵyna Tyl jáne qarý-jaraq bastyǵy jeke quramnyń qysqy kiim-keshekpen, al áskeri tehnikanyń janar-jaǵarmai materialdarymen tolyq qamtamasyz etilýi týraly málimetter usyndy.
Sondai-aq Qarýly Kúshterde áskerlerdi qorytyndy tekserý merzimi belgili boldy. Qorytyndy tekserý 5-16 qazan aralyǵynda ótpek. Oǵan jeke quramnyń 100 paiyzy qatysady. Árbir áskeri qyzmetshi normativterdi oryndaý, synaqtar men test tapsyrý qorytyndylary boiynsha óziniń kásibiligi negizinde baǵalanady. Bólimshelerdiń jaýyngerlik qabilettiligi men úilesimdiligi, komandirlerdiń jeke quramdy basqara bilýi eseptik kezeńde ótkizilgen oqý-jattyǵýlardyń nátijeleri boiynsha baǵalanatyn bolady.
