Messendjerlerde Qazaqstan eldiń batysy men soltústigine ásker tartyp, Ýkrainaǵa qarsy soǵysqa qatysatyny týraly aqparat tarady. Buǵan áskeri tehnikanyń Qazaqstan ishindegi qozǵalysy dálel retinde usynylyp otyr. QR Qorǵanys ministrligi bul aqparatty joqqa shyǵardy, dep habarlaidy Stopfake.kz saity.
Vedomstvoda túsindirgendei, taratylǵan videoda áskeri tehnikalardyń áskerlerdiń jaýyngerlik daiarlyq sheńberindegi qozǵalysy kórsetilgen. Bul – josparly is-shara.
– Qorǵanys ministrligi Áskeri kolledjiniń oqýshylaryna praktikalyq sabaqtar ótkizý úshin Semei garnizonynan Shýchinsk qalasyna áskeri tehnika jóneltildi. Ústimizdegi jyldyń 25 aqpany men 3 naýryzy aralyǵynda Qaraǵandydan Gvardeisk garnizonyna, sondai-aq Almatydan Aqtaý garnizonyna áskeri tehnika jiberildi. 1-4 naýryz aralyǵynda Shymkentten Tarazǵa, Túrkistanǵa, «Aisha-bibi» poligonyna jáne keri baǵytta Qarýly kúshterge tiesili tehnikalardyń qozǵalysy josparlanyp otyr. Atalǵan kezeńde jóndeý jumystaryn júrgizý úshin áskeri tehnikalardy temir jol kóligimen Batys Qazaqstannan eldiń ońtústik bóligine josparly túrde jetkizý iske asyrylý ústinde», – delingen QR Qorǵanys ministrliginiń resmi Telegram-arnasynda.
Áskeri tehnikanyń qozǵalysy týraly, buǵan deiin BAQ-ta habarlandy.
Eske sala keteiik, buǵan deiin Qorǵanys ministrligi Qazaqstan Ýkraina aýmaǵyna ásker jiberedi degen qaýesetti joqqa shyǵardy:
«Beibitshilik pen qaýipsizdikti qoldaý jónindegi halyqaralyq mindettemelerdi oryndaý úshin Qazaqstan Respýblikasy Qarýly Kúshteriniń áskeri kontingentin jiberý týraly sheshimdi el Prezidentiniń tiisti usynysy negizinde Parlament qabyldaidy. Qazaqstan áskeri qyzmetshilerin Ýkrainaǵa nemese odan basqa elge jiberý týraly suraý túsken joq jáne tiisti túrde qaralyp ta jatqan joq».
