Qorǵanys ministrligi jaýyngerlik maqsatta paidalanylatyn ushqyshsyz ushý apparattarymen tanystyrdy, dep habarlaidy "Ult aqparat" vedomstvonyń baspasóz qyzmetine silteme jasap.
Qazaqstannyń Qarýly kúshterinde ushqyshsyz aviatsiialyq júielerdi engizý jáne damytý boiynsha belsendi jumys júrgizilip jatyr.
«Ushqyshsyz ushý apparattarynyń paida bolýy áskerler men qarý-jaraqty qoldanýda jańashylyq boldy. Búginde olar qarýly qaqtyǵystarda da, sondai-aq is-sharalardyń qaýipsizdigin qamtamasyz etý úshin de keńinen qoldanylady. Qarý-jaraqtyń bul túri Qazaqstan áskerinde belsendi túrde engizilip keledi. Qarýly kúshterdiń Qurlyq áskerleri «SkyLark» taktikalyq ózdiginen ushatyn apparatpen jabdyqtalǵan. Ol 10 sharshy shaqyrym aýmaqty baqylaýǵa arnalǵan, bazadan 40 shaqyrym qashyqtyqta birneshe júzdegen metr biikten jerdegi adamdardy kórýge jáne sýretti operatordyń monitoryna berýge qabiletti.
Áskeri-áýe kúshteriniń esebinde «WingLoong» barlaý-soqqy berý kesheni bar. Ol áýe barlaýyn júrgizý mindetterin ǵana oryndap qoimai, basqarylatyn zymyrandar jáne bombalarmen joǵary dáldikte soqqy berýge de qabiletti», delingen habarlamada.
Vedomstvonyń málimdeýinshe, ózdiginen usha alatyn apparattar arnaiy infroqurylymdy talap etpeidi. Bul rette olar, jaýyngerlik tiimdilikti aitarlyqtai arttyryp, aviatsiia júktesin tómendetedi. Olar maqsatty aiqyndaýǵa, artilleriia atysyn túzetýge, jerdegi nysanaǵa soqqy berýge, asa mańyzdy nysanalar men olardyń elementterin jedel tereńdikte joiý úshin qoldanylady.
«Koronavirýs pandemiiasyna bailanysty tótenshe jaǵdai kezinde QR Qarýly Kúshterinen ushqyshsyz ushý aparattarynyń esepteri tartyldy. Olardyń kómegimen 80-ge jýyq buzýshylyq anyqtaldy. Atap aitqanda karantin aimaqtarynan tys jerlerge ruqsatsyz adamdardyń jáne kólikterdiń shyǵýy anyqtalǵan», delingen habarlamada.
Ushqyshsyz ushý apparattaryn qamtamasyz etý men paidalaný boiynsha mamandardy Áýe qorǵanysy kúshteriniń Áskeri institýty daiarlaidy.
Taraz qalasynda ushqyshsyz ushý apparattaryn daiyndaý jáne jaýyngerlik qoldaný ortalyǵy quryldy. Ol jerde operatorlar biliktiligin arttyryp, nusqaýshylardy oqytady. Sondai-aq jyl saiyn oqý-ádistemelik jiyndar da ótkiziledi.
«Qazaqstandyq áskeri qyzmetshiler biliktilikterin Armiia halyqaralyq oiyndary barysynda da shyńdai túsedi. Qazaqstan jyl saiyn elimizde ótkiziletin «Suńqar ańshylyǵy» ushqyshsyz ushý apparattaryn esepteý saiysynyń bastamashysy boldy. 2017 jyldan 2019 jylǵa deiin Qarýly kúshteriniń komandasy saiysta birinshi orynǵa ie bolýy, bul bizdiń elimizde qarý-jaraqtyń osy túrin tabysty qoldaný men damýyn aiqyndai túsedi», delingen habarlamada.
