- 3 qańtar kúni Qazaqstan BUU Qaýipsizdik Keńesiniń turaqty emes múshesi retinde 2017 jylǵy Keńestiń alǵashqy otyrysyna qatysty.
Otyrys barysynda 2017 jyldyń qańtar aiyna arnalǵan Qaýipsizdik Keńesiniń jumys baǵdarlamasy bekitildi. Qazaqstandyq delegatsiiany Qazaqstan Respýblikasynyń Ýaqytsha senimdi ókili Barlybai Sadyqov bastap bardy.
Sol kúni Qaýipsizdik Keńesine múshe Boliviia, Ulybritaniia, Egipet, Italiia, Qazaqstan, Qytai, Resei, Senegal, AQSh, Ýkraina, Ýrýgvai, Frantsiia, Shvetsiia jáne Japoniianyń barlyq delegatsiia jetekshileriniń dástúrli resmi kezdesýi boldy. Shara Shvetsiia koroldiginiń ýákildiginde bul eldiń turaqty ókili, 2017 jyldyń qańtarynan Qaýipsizdik Keńesin basqaratyn Olaf Skýgtyń tóraǵalyǵymen ótti, dep habarlaidy QR Syrtqy ister ministrligi.
BUU Qaýipsizdik Keńesi músheleriniń aldynda sóz sóileý barysynda B.Sadyqov atalǵan uiym jumysyndaǵy preventivtik diplomatiia jáne senim sharalaryn nyǵaitý, halyqaralyq terrorizmge qarsy kúres, janjaldardy retteý jáne taratpaý syndy Qazaqstan úshin mańyzdy máselelerdi atap ótti.
Osy oraida B.Sadyqov Qazaqstan Prezidenti Nursultan Nazarbaevtyń 25 jyl buryn Birikken Ulttar Uiymynyń qabyrǵasynda jariialaǵan Aziiadaǵy ózara yqpaldastyq jáne senim sharalary jónindegi keńesti shaqyrý bastamasynyń sátti júzege asqanyn jáne dialogtyq forýmnyń Aziia qurlyǵyndaǵy qaýipsizdikti nyǵaitýǵa eleýli úles qosyp otyrǵanyn atap ótti.
Búgin Keńestiń Siriia (eldegi himiialyq qarý jaǵdaiy) jáne Iraktaǵy (gýmanitarlyq aspekt) jaǵdai jóninde jabyq konsýltatsiiasy ótedi.
